Rai ne'e tuir planu sei harii eskuadra polisia Na'i Feto.

Sekretariu Estadu Teras no Propriedades (SETP) Mario Ximenes hatete, rai ne'ebé daudaun ne'e atu harii eskudra polisia rai estadu, la'os rai privadu.

"Rai ida ne'ebé mak uluk ita-nia inan-aman CPD-RDTL uza iha Balide no agora atu tau eskuadra polisia Na'i Feto nian, rai ne'e uluk tempu governu tranzitadu, sira uza hala'o atividade, maibé agora sira ezije fali rai ne'e atu fó fali ba sira, ne'e mak sira hato'o pedidu antes ona, maibé pedidu ne'e la klaru", dehan SE Mario iha nia knar fatin, foin lalais.

"Ita haree nia prosedor ne'e entre sosiedade sivil ho ajensia ka instituisaun estadu nian ne'ebé atu garante seguransa ba sidadaun, sira nain rua ne'e mak agora hada'u-malu fatin ne'e", katak nia.

Atu entrega rai ne'e ba see, SE Mario dehan, sei haree lai ninia prosesu hodi bele hatene see loos mak merese atu uza.

"Maibé ba see mak merese atu utiliza mós tenke tuir rekezitus ne'ebé lei haruka, dadaun rai ne'e hanesan estadu nian hela, laiha ema ida nai'n."

Bainhira rai ne'e tama iha kategoria rai estadu, nia hatutan, teras propriedades no ministeriu justisa mak bele jere.

"Maibé daudaun nia prosesu sei la'o hela," dehan nia.