"Nia (Taur) ko'alia ona ha'u fiar. Maun Taur sei kumpre ninia liafuan. Ema hanesa eis-militár ko'alia kuandu A ne'e A ona, laiha tan seluk", dehan nia, iha Parlamentu Nasionál, Tersa (25/2).
Deputadu ne'e relata, Primeiru Ministru kuandu hato'o ona demisaun ba Prezidente Repúblika, Fransisco Guteres Lú Olo, laiha ona dalan ba parlamentu atu uza mosaun sensura hasoru Primeiru Ministru.
"Laiha mosaun sensura, mosaun ba halo saida? Agora ema ko'alia ona ita ba kaer riba ba rai ne'e laiha dalan. Ita advezes inventa sasán barak halo ema konfuzaun", tenik Duarte .
Entertantu, Prezidente Bankada CNRT relata, depois Prezidente Repúblika dekreta demisaun primeiru ministru hafoin koligasaun foun aprezenta lista membru governu ba dasia nian.
Molok ne'e, liu husi intervista iha televizaun GMN ho fiar aan Xanana halo promesa ba públiku katak sei la hola parte iha governu foun mai, tanba CNRT forma governu ho partidu ne'ebé de'it, maibé ninia ema sei la hetan pose husi Prezidente Repúblika.
“CNRT hatene katak atu forma Governu foun karik ho sé-sé de’it, nia ema sira sei labele fó pose. labele! tanba ne’e mak CNRT iha serteza absoluta ida ne’e, nia ema sira la bele toma pose. Ne’e mak CNRT labele halimar fali katak ohin temi halo diálogu, halo diálogu, ba halimar fali diálogu. Atu governu foun ho Partidu saida de’it”, dehan Xanana Gusmão Prezidente CNRT.
Antes ne'e, Primeiru Ministru, Taur Matan Ruak, hatama karta ona demisaun no daudaun ne'e hein deit Prezidente Repúblika atu dekreta.
"Ha'u hatama karta ida, manifesta ba ha'u-nia demisaun," dehan PM Taur, iha Palásiu Prezidensiál, Bairru-Pité,Tersa (25/2).
Eis-Jeneral akresenta liután, karta demisaun ne'ebé hatama validu bainhira Prezidente Repúblika dekreta tuir Konstituisaun.
"Pedidu demisaun ne'e validu kuandu Prezidente dekreta ona, enkuantu seidauk ha'u kontinua nu'udar Primeiru Ministru," Taur akresenta.
Antes ne'e mós, Prezidente Repúblika, Francisco Guterres Lú Olo hatete, Taur Matan Ruak kontinua asume kargu Primeiru Ministru tanba VIII Governu nafatin iha plena funsaun normál, no Governu ida laiha bainhira Primeiru Ministru hatama karta demisaun tuir Konstituisaun RDTL 112. (*)