Iha selebrasaun ne'e, Xefe Estadu mós temi saudozu balun ne'ebé mate iha prosesu luta libertasaun nasionál hanesan, Prezidente Nicolau Lobato, Rosa Muki, Borja da Costa, Maria Tapó, Vicente Sa’he, Soimali, Maria Goretti Joaquim, Hodu Ran Kadalak, Sabalae, David Alex no Nino Konis Santana.
Lori Estadu Timor-Leste nia-naran, Lú Olo mós hato’o rekoñesimentu boot ba kombatente libertasaun nasional, feto no mane, koñesidu no deskoñesidu, ne’ebé kontribui liuhusi hahalok ki'ik ka boot, iha freente armada, klandestina no esterna ka diplomátika.
Nune'e, Prezidente Repúblika hato'o agradesementu no husu atu sidadaun hotu hakru'uk ba memoria luta pasadu
"Ohin, iha fatin istóriku ida-ne’e, ha’u husu ba hotu-hotu hakru’uk ba memória hotuhotu nian, feto no mane! Tanba lista rohan-la'ek," dehan Lú Olo, iha ninia diskursu ba selebrasaun loron Veteranu, iha Palásiu Governu, Tersa (3/3).
Xefe Estadu ne'e hato'o mos agradesimentu ba solidariedade internasionál ne’ebé Timor-Leste simu husi Portugál no Mosambike, Ángola no eis-kolónia portugeza sira seluk iha Áfrika, husi governu balun, partidu polítiku, organizasaun naun-governamentál no sidadaun sira iha mundu tomak.
Tanba liuhusi ema sira ne'e hotu ninia kontribuisaun maka Timor-Leste bele hetan duni ninia Independénsia.