Sekretáriu Jerál Partidu FRETILIN, Mari Alkatiri hateten, FRETILIN hanesan partidu úniku ida iha Timor-Leste nafatin prontu kompete ho partidu polítiku sira seluk iha eleisaun antesipada.

"Atu monu ka akontese iha loron aban ka kualkér tempu ne'ebe de'it", dehan nia, hafoin partisipa iha selebrasaun loron Veteranu, iha Palásiu Governu, Tersa (3/3).

Nune'e, estratejia ne'ebé FRETILIN prepara iha pos-eleisaun maka manan maioria absoluta maka foin forma inkluizaun.

Estratejia ne'e FRETILIN opta bazeia ba esperiensia agora nian, ne'ebé partidu ki'ikoan sira maka sai fali determinante ba maioria parlamentár.

Antes ne'e, bainhira prosesu diálogu ho Prezidente Repúblika la'o hela, Partidu FRETILIN deklara nakloke nafatin ba diálogu no rejeita eleisaun antesipada (EA) ba dala rua.

"Ha'u-nia esperansa lakohi atu iha eleisaun antesipada," dehan Sekretáriu Jerál FRETILIN, Mari Alkatiri, iha Palásiu Prezidensiál, Bairru-Pité, Sesta (24/1).

FRETILIN la konkorda ho eleisaun antesipada tanba mandatu Prezidente Repúblika nian iha períodu ida halo kedas eleisaun antesipada dala rua no povu mós kole ona ho eleisaun.

Mari hatete, FRETILIN sempre nakloke no nunka rejeita atu halo diálogu ho partidu sira seluk. (*)