Iha diskusaun dahuluk Xanana Gusmão Cs fila ho 'oin mean' tanba Prezidente Repúblika seidauk aseita koligasaun foun atu forma IX Governu Konstitusionál tanba la prienxe rekizitu balun.

Antes ne'e, iha tinan 2019, Prezidente Aliansa Mudansa ba Progresu (AMP) sesante, Kay Rala Xanana Gusmão deklara, Prezidente Repúblika, Francisco Guterres Lú Olo, beik-teen tanba veta Orsamentu Jerál Estadu (OJE) tinan fiskál 2019.

Tuir nia, veta OJE 2019 laiha rasiosinu no justifikasaun klaru. Tanba ne'e, keta Xefe Estadu sarjana supermie.

"Nia beik-teen. Ha'u lee tiha nia justifikasi la presiza. Asal bunyi, hatudu dehan hatene mas afinál rasiosinu no lójika laiha liu. Ne'e ha'u dala ruma hanoin katak, sarjana supermie karik", deklara Xanana.

Maski nune'e, iha ambitu diskusaun impase konstitusionál agora daudaun, ema ne'ebé uluk Xanana bolu beik-teen agora fila hanorin fali Xanana, bainhira sira aprezenta koligasaun foun ho intensaun kaer ukun.

Lú Olo hanorin Xanana Cs atu partidu sira ne'ebé inklina iha koligasaun atu halo konferénsia nu'udar desizaun altu bainhira foti pozisaun tama ba koligasaun ruma.

Tanba laiha preparasaun di'ak bainhira hasoru ema ne'ebé uluk Xanana rasik konsidera beik-teen no sarjana supermie, membru koligasaun ne'ebé lider husi Prezidente Partidu CNRT, Kay Rala Xanana Gusmão, tenke fila ho 'hakruuk'.

"Prezidente Repúblika sei hakarak hatene di'ak liután no koligasaun ne'e seidauk prienxe rekizitu sira ne'e balun. Tanba ne'e, ami sei fila depois mak koligasaun sei buka fo fila-fali resposta ba Prezidente," dehan Sekretáriu Jerál PD, Antonio da Conceição, iha Palásiu Prezidensiál, Bairru-Pité, Sesta (6/3).

Nia akresenta, Prezidente Repúblika simu koligasaun nia dispozisaun ne'ebé hato'o iha karta ho intensaun atu forma governu, maibé agora daudauk sei iha rekizitu balun ne'ebé presiza atu koligasaun foun ne'e prienxe.

Kondisaun ne'ebé koligasaun foun tenke halo mak tuir lei partidu polítiku katak tenke iha konferénsia ka kongresu.

Purtantu, baze konferénsia no kongresu ne'e mak Prezidente Repúblika, Francisco Guterres Lú Olo husu atu hatene klean tan prosedimentu ida hodi lori ba koligasaun.

"Tanba ne'e, ami seidauk iha kondisaun ida para hataan diretamente ba Prezidente Repúblika," dehan Kalohan.

Entertantu, koligasaun foun ne'ebé hasoru ona ho Prezidente Repúblika, Francisco Guterres Lú Olo ne'ebé kompostu husi CNRT, PD, KHUNTO, PUDD, Frente-Mudansa no UDT ne'ebé lidera dereita husi Xanana Gusmão. (*)