Nia argumenta lia hirak ne'e, tanba deputadu sira hato'o preokupasaun povu nian, maibé haluha tiha katak governu labele funsiona tanba laiha osan hodi halo dezenvolvomentu.
"Ohin loron ita hotu sisi ba governu atu haree, mas agora ita presiza haree kondisaun saida mak ita tau ba governu atu haree no halo. Hasoru problema boot hotu-hotu sai hanesan anju, maibé haluha responsablidade Parlamentu nian atu fó osan ba governu. Ita labele sai hanesan anju iha problema laran", dehan Deputadu António, iha Uma Fukun PN, Segunda (9/3).
Eis-kandidatu Prezidente Repúblika ne'e afirma, antes atu sisi governu presiza reflete buat sira ne'e ho konxiénsia no onestu atu halo, labele ezije governu la ho orsamentu.
Nune'e, ezije ba governu atu halo tenke haree mós ba responsablidade Parlamentu Nasionál nian, kuandu seidauk fó orsamentu ba governu ko'alia tenke sukat.
"Diabu no anju mak sé? Ne'e para ita hotu bele hatene katak buat sira ne'e ita mos iha responsablidade. Ha'u konkorda governu laiha kbiit atu halo, tanba governu la'ós halo milagre", dehan António.
Parlamentu Nasional liu-liu membru AMP husi partidu CNRT hetan ordem hodi vota abstain no kontra sira nia governu nia OJE iha loron 17 fulan Janeiru 2020. (*)