Tempotimor (Dili) - Taur Matan Ruak lakohi komenta relasiona ho koligasaun foun ne'ebé indijita ona Xanana Gusmão. Atuál Primeiru Ministru hakarak husik prosesu la'o.
"Husik ba prosesu la'o, ita haree mak asuntu sira ne'ebé ohin ha'u ko'alia (kona-ba Corona Virus)," dehan Taur, iha Palásiu Prezidensiál, Bairru-Pité, Kinta (12/3).
Antes ne'e, CNRT liuhusi konferénsia nasionál esklui ona PLP husi Aliansa Mudansa ba Progresu (AMP) no hamosu fali kompozisaun foun ne'ebé kompostu husi CNRT, PD, KHUNTO, PUDD, UDT no Frente-Mudansa.
Nune'e, liuhusi Sekretáriu Jerál PD, António da Conceição "Kalohan", hatama ona karta ba Palásiu Prezidensiál no deklara koligasaun foun indijita Prezidente CNRT, Xanana Gusmão, nu'udar Primeiru Ministru IX Governu hodi substitui Taur Matan Ruak.
Entertantu, Taur Matan Ruak mos foin lalais ne'e ofisialmente hatama ona karta demisaun no kontinua hein dekreta husi Prezidente Repúblika, Francisco Guterres Lú Olo, maibe to'o agora seidauk dekreta sai. (*)