CNRT So Tauk Golpe ho Kilat, Foin Golpe ho Politika Normal

Eis Prezidente AMP, Kay Rala Xanana Gusmao (klaran), (Sorin los) Konseleiru AMP, Jose Bukar Naimori no (sorun Karuk) Porta voz ba AMP, Taur Matan Ruak  foto ho sinal AMP hamutuk durante kampania EA 2018 Eis Prezidente AMP, Kay Rala Xanana Gusmao (klaran), (Sorin los) Konseleiru AMP, Jose Bukar Naimori no (sorun Karuk) Porta voz ba AMP, Taur Matan Ruak foto ho sinal AMP hamutuk durante kampania EA 2018 Foto Suplai

Tempotimor (DILI): Bankada CNRT iha Parlamentu Nasionál deklara so tauk de'it bainhira grupu balun ho kilat halo golpe estadu, maibé ba kestaun politika CNRT konsidera sai buat baibain ida.

Prezidente Bankada CNRT Duarte Nunes dehan, golpe signifika bainhira ema ka grupu ida hada'u poder ho forsa.

Tan ne'e, Duarte la konkorda ho deklarasaun husi Vise Prezidente bankada PLP Francisco Vasconcelhos ne'ebé konsidera CNRT ho nia aliadu sira halo golpe hasoru estadu Timor Leste.

Lee mós: Indizita PM Foun, CNRT ho Nia Aliadu Tenta Halo Golpe

"Golpe ba estadu ne'e kuandu kaer kilat mak ita tauk, maibé ba politika ne'e fasil hela. Politika mak halo golpe ne'e normal, tanba ba iha tribunal sei hasai desizaun tuir Lei, agora buat seluk ne'e interpretasaun ida-idak nian no ha'u la hatan ba PLP nia deklarasaun," deklara nia iha Parlamentu Nasionál, Kinta (12/02).

Nia dehan, CNRT ho nia aliadu sira la'o tuir hela regra ne'ebé iha tan ne'e la merese atu bolu nu'udar golpe.

"Sira (PLP) dehan golpe estadu, enkuantu golpe estadu ne'e signifika iha forsa ida que hada'u poder, maibé agora ita la'o tuir hela dalan ida ne'ebé di'ak, husi legal ka la legal ita hato'o ba no la legal ou legal ne'e to'o iha ne'ebé ida ne'e golpe estadu oinsa?" dehan nia.

Tan ne'e, tuir Duarte entendimentu golpe husi parte PLP ladun di'ak no halo ema laran taridu.

"Mais prontu, ema ida ko'alia ne'e intende golpe estadu ka lae? Kuandu ema hada'u poder ho forsa ne'e buat seluk ida no ida ne'e mak dehan golpe estadu," dehan Duarte.

Entretantu, Vise Xefi Bankada PLP Francisco Vasconcelhos hatete, desizaun husi koligasaun foun ne'ebé kompostu husi CNRT, PD, KHUNTO, PUDD, no UDT/FM hodi indizita Prezidente Partidu CNRT Kay Rala Xanana Gusmão ba primeiru ministru governu dasia nu'udar tentativa atu halo golpe ba estadu Timor Leste.

"Ha'u rona horseik, hodibainrua sira (Koligasaun foun) lori ona karta ba prezidente republika atu halo audensia no mós partidu koligasaun ne'e indizita primeiru ministru, ne'e sira viola ona artigu 106", dehan Vasconcelhos iha bankada PLP parlamentu nasional, Kinta (12/3).

Deputadu ne'e fo razaun, koligasaun foun atu indizita primeiru ministru, tenke konprova hodi hatudu ba prezidente republika katak, partidu maioria mak ida ne'ebé, tanba tuir  konstituisaun RDTL artigu 106 katak tenke iha maioria ida mak bele indizita primeiru ministru.

"Iha meza parlamentu sira (Koligasaun foun) nusa mak indizita primeiru ministru, ne'e ba PLP katak, tentativa golpe estadu, tanba ita labele indizita uluk primeiru ministru kuandu primeiru ministru ida seluk sei iha."

Nia hatutan, meza parlamentu nasional kinta legislatura ne'e kompoin husi PLP, CNRT, Khunto ho FM ne'e hatudu katak, koligasaun foun tenke halo distribuisaun ba meza parlamentu nian, depois bele fo garantia ba prezidente republika iha maioria ida mak indizita primeiru ministru.

Nia esplika, regra juridika iha Timor Leste laiha defenisaun kona-ba governu jestaun, maibé governu ida agora ne'e plena poderes katak laiha orsamentu jeral, maibe la'o ho duadesimu to'o Orsamentu jeral estadu aprova.

"Ne'e signifika katak, enkuantu Prezidente Republika seidauk dekreta pedidu demisaun husi primeiru ministru no mantein nafatin meza parlamentu dadaun ne'e signifika situasaun la'o normal hela, tanba ne'e ami dehan tentativa golpe estadu," nia afirma.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.