Prezidente Bankada CNRT Duarte Nunes hatete, PM Taur hato'o pedidu demisaun ba PR Lu Olo tanba hakarak entrega ba governu foun tan ne'e loloos laiha ona problema.

"Ida ne'e hanesan ne'e, ha'u bele intende ema ba ho nia pozisaun di'ak ona hakarak viabiliza, tanba ne'e mak nia (PM Taur) hato'o ona nia (pedidu) demisaun, agora Prezidente (Repúblika) atu simu, tuir loloos Prezidente haree katak governu ida mai tenke ida sai hodi fó fatin par ida tama, entaun primeiru ministru disponivel entrega ona, ne'e signifika nia (PM) mak hakarak entrega ba governu foun, logika pensamentu ne'e hanesan ne'e," deklara Duarte iha PN, Kinta (12/03)

Duarte hatutan, PR Lu Olo mak husu atu partidu politiku sira ne'ebé asentu iha PN buka malu hodi harii koligasaun.

Hafoin ida ne'e, nia hatutan, partidu sira hanesan CNRT, PD, KHUNTO, PUDD, no UDT/FM deside hori forma koligasaun foun no hato'o ona ba PR Lu Olo.

"Agora Prezidente Republika haree husi lei, baze legal, par haree took ba, se nia (PR) la simu, entaun iha ikus mak eleisaun antesipada ona. Ida ne'e mak ita hotu hein desizaun saida mak Prezidente Republika atu foti".

Nia hatutan, bainhira PR la simu koligasaun foun ne'e, PR tenke aprezenta razaun tanba sa la simu.

"Tanba nia (PR Lu Olo) mak husu ema buka malu atu forma (koligasaun), priense rekezitu númeru dois par bele solusiona situasaun impase politika ne'e, maibé to'o iha ne'e nia lakohi fali tanba saida? Tenke esplika, povu mak manda ita, tanba saida mak lakohi," dehan nia.

Hatan kona-ba deklarasaun husi CNRT iha Konferensia ne'ebé hala'o foin lalais katak Aliansa Mudansa ba Progresu (AMP) ne'ebé forma iha 2018 sei eziste, Duarte dehan, bazeia ba akordu entre partidu ne'ebé halibur iha AMP 2018 katak hafoin loron 30 formasaun governu AMP la eziste ona.

"Ita kaer ba akordu entre Aliansa Mudansa ba Progresu ne'e hotu ona depois de 30 dias formasaun governu, ita ne'e mak tau iha akordu, no depois de ida ne'e mak forma fali Aliansa Maioria Parlamentar ne'ebé FM ho UDT tama hotu, tanba ne'e mak ida ne'e ita tenke kaer iha ne'ebá, lei klaru hela no intendimentu ka akordu mós klaru," Duarte esplika.

Iha lei partidu politiku, nia hatutan, kuandu iha akordu pre-eleitoral signifika atu hakat ba eleisaun hodi ultrapasa eleisaun no bainhira liu ona eleisaun partidu sira fahe malu.

"Kuandu pre-eleitora ida lakohi ona ka fó situasaun ba tribunal, ne'e direitu ninian, tanba lei partidu politiku to'o iha parlamentu odamatan taka ona, hakarak sees ka oinsa iha fali regra foun," nia dehan.