CNRT ne'ebé lidera husi Kay Rala Xanana Gusmão ikus mai konsege forma koligasaun foun ho partidu PD, KHUNTO, PUDD, no UDT/FM.
Vise Prezidente bankada Partidu Libertasaun Popular (PLP) Fransisco Vasconcelhos konsidera politika CNRT la lojika tanba hafoin deside xumba OJE 2020, ikus mai CNRT halai fali ho partidu seluk atu hadia problema.
"Koligasaun foun ida agora la'o iha nakukun laran, tanba partidu CNRT mak xumba tiha orsamentu jeral estadu konke sira halai hamutuk par fó solusaun ba problema ne'e laiha logika," deklara Vasconcelhos iha parlamentu nasional, Kinta (12/03).
Tuir nia, koligasaun foun ne'ebé CNRT ho nia aliadu sira forma nu'udar triangulu ida.
"CNRT propriu iha problema depois partidu seluk lori tan sira-nia problema ba forma triangulu ida," dehan nia.
Nia esplika, CNRT iha problema barak, tanba molok ne'e CNRT fó razaun katak sira vota abstensaun tanba membru governu nain hitu husi CNRT la hetan pose.
Maibé, nia dehan, iha 6 Marsu 2020 bainhira hasoru-malu ho Prezidente Repúblika Francisco Guterres Lu Olo, CNRT fó fali argumentu seluk katak sira vota abstein ba proposta OJE 2020 tanba Primeiru Ministru Taur Matan Ruak halai sees husi programa ne'ebé aprovadu, OJE la tuir estrutura, no PM la konsidera asuntu ne'ebé durante ne'e halo rezolusaun.
"Orsamentu jeral estadu la tuir lei jestaun finanseira ne'e mak retira tiha no hadi'a, hafoin aprezenta segundu fali mai parlamentu nasional, ida ne'e hatudu katak problema rezolve tiha ona, nune'e mai fali tanba governu ida la'o ho ain kadik no sobu sistema, iha ne'e haree katak CNRT la konsistente."
Tan ne'e, deputadu ne'e dehan, koligasaun foun ne'ebé CNRT ho nia aliadu forma no asina ona plataforma so aumenta de'it konfuzaun no sei la fó solusaun ba impase politika iha TL.
"Entaun ba ami PLP haree katak sei laiha solusaun (ba impase politika)," dehan nia.