Tan Kadeira, PUDD no UDT/FM Haluha PDN

Prezidente PDN, Fernando Gusmao iha kampana FDD iha 2018 iha Tasi Tolu Prezidente PDN, Fernando Gusmao iha kampana FDD iha 2018 iha Tasi Tolu Foto File

Tempotimor (Dili)-Partidu Dezenvolvimentu Nasionál (PDN) deside hodi envolve aan iha Frente Dezenvolvimentu Demokratiku (FDD) hamutuk ho Partidu Unidade Demokratiku Dezenvolvimentu (PUDD), Uniaun Demokratiku Timorense (UDT) no Frente Mudansa hodi hasoru eleisaun antesipada iha tinan 2018.

Lideransa PDN hamutuk ho lider PUDD, UDT no FM serbisu maka'as atu bele hetan netik konfiansa husi povu atu bele tuur iha Parlamentu Nasionál hodi defende povu nia direitu.

Ikus mai, sira-nia serbisu hamutuk ne'e konsege lori duni rezultadu. FDD hetan kadeira tolu iha Parlamentu Nasionál.

Tanba hetan de'it kadeira tolu, PDN "sakrifika an" hodi la tama iha Parlamentu Nasionál, ho kondisaun katak, karik iha oportunidade no hetan konvite husi Aliansa Mudansa ba Progresu (AMP) atu envolve an iha governu, PDN nia ema mak sei ba.

Maibé, hein ba hein, oportunidade ne'e ladauk mosu no ikus mai, CNRT baku mate AMP no fahe-malu.

PUDD, UDT/FM ho sira-nia reprezentasaun iha PN hahú aproveita oportunidade ne'ebé iha hodi envolve an iha koligasaun foun ne'ebé forma husi CNRT hamutuk ho PD no KHUNTO.

Partidu tolu ne'e hahú haluha sira-nia "kolega" PDN ne'ebé iha li'ur hela no hein oportunidade balun. Partidu tolu ne'e ba mesmesak no asina ona akta koligasaun foun.

"Simplesmente PDN ezije ninia direitu ba kolega na'in tolu ne'ebé momentu la'o hamutuk iha eleisaun antesipada, publiku hotu akompaña katak PDN iha momentu ne'ebá partisipa maka'as iha prosesu eleisaun no kampaña ou debate sira ne'ebé CNE organiza, no PDN fiar katak rezultadu ne'ebé FDD hetan iha momentu eleisaun (tanba) kontribuisaun maka'as mós husi partidu PDN," deklara Prezidente PDN Fernando Gusmão liu husi konferensia imprensa iha Hotel Arbiru, Bebonuk, Dili, Sesta (13/03).

Fernando dehan, bainhira FDD hetan asentu iha PN, iha akordu entre sira hakotu direitu lubuk ida ne'ebé atu atribui ba PDN, katak PDN la okupa lista kandidatu ba Parlamentu.

"Entaun se ba governu karik PDN mak hetan prioridade atu ba iha ne'ebá. Agora ami ezije ne'e tanba kolega tolu ne'ebé uluk hamutuk agora sira mesmesak ba halo ona negosiasaun i la envolve partidu PDN iha laran, ne'ebé tuir desizaun akordu ne'ebé ami iha ne'e katak prioridade ne'e mai ami (PDN), tanba ne'e mak ami ezije ba ami-nia kolega na'in tolu ne'e, maibé ami la ezije partidu boot sira," dehan nia.

Ho nune'e, Fernando apela ba lider PUDD, UDT/FM atu kontaktu PDN hodi rezolve sira-nia problema ne'e iha.

Bainhira PUDD, UDT/FM la ho boa fe hodi koalia ho PDN, Fernando ameasa atu hatama fali prosesu judisiariu ne'ebé PDN dada ona iha semana ida liu ba.

"Tanba sira hakarak kontaktu ami hodi hakotu problema iha ita-nia rai, (PDN) dada prosesu tomak ne'ebe hato'o ona ba orgaun juridisiariu, mais ami hein fin da semana ida ne'e sira laiha boa fe atu mai hamutuk ho ami, mak ami sei kontinua fila-fali hato'o prosesu no keixa sira ne'ebé hato'o ona ba prokurador jeral, Tribunal Rekursu no entidade seluk-seluk to'o PDN hetan ninia justisa".

Ho razaun hirak ne'ebé iha, Prezidente PDN ne'e dehan, la sala bainhira PDN ezije ninia direitu tuir akordu ne'ebé sira halo hamutuk iha FDD.

Rate this item
(0 votes)
Last modified on Saturday, 14 March 2020 16:28
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.