Sekjer FRETILIN hato'o kestaun ne'e relasiona ho fronteira maritima ne'ebé tuir informasaun katak Xanana deklara FRETILIN vota kontra.
Tuir Alkatiri, iha sestu governu konstitusional mak hahú ko'alia hamutuk ba tasi Timor no ho Primeiru Ministru kria komisaun ida hodi halibur ideia ka opiniaun atu buka solusaun ba fronteira maritima.
Tanba ne'e, nia dehan, produtu fronteira maritima ne'e mai husi pensamentu koletivu, naturalmente iha ekipa ida halo negosiasaun.
"Ba fronteira maritima fó parabéns ba xefe da ekipa. Fronteira maritima ne'e hanesan akordu ida mai parte interese nasional, sala iha akordu ida ne'e bainhira tau hotu fali pakote ekonomiku tama hotu iha laran," dehan Alkatiri liu husi konferensia FRETILIN dala haat iha Salaun São José Katedral, Dili, Sabadu (14/03).
Tuir Alkatiri deklarasaun Xanana katak FRETILIN vota kontra fronteira maritima nu'udar lia bosok.
"Xanana dehan FRETILIN vota kontra Fronteira maritima ne'e nia bosok, FRETILIN la vota kontra fronteira maritima, vota kontra pakote ekonomiku komersial no vota kontra 35 pursentu ne'ebé ita oferese de'it ba Australia, lalika mai ho bosok par manan fali povu," dehan Alkatiri.
Sekjer FRETILIN ne'e dehan, FRETILIN hatene saida mak Xanana halo, tan ne'e liu husi konferensia ne'ebé hala'o sei aprova rezolusaun ida ba rekoñese fronteira maritima.
"FRETILIN hatene saida mak nia (Xanana) halo, tanba ne'e iha konferensia ida ne'e atu aprova rezolusaun ida ba rekoiñese fronteira maritima, mais atu loke fali negosiasaun pakote ekonomiku komersial, oras to'o ona," dehan nia.