Inundasaun Husik Hela Sofrementu ba Dili

Membru PNTL husi COE hamos hela foer husi Inundasaun loron sexta semana kotuk Membru PNTL husi COE hamos hela foer husi Inundasaun loron sexta semana kotuk Foto Suplai

Tempotimor (Dili) - Udan boot iha Sesta (13/3), hamosu inundasaun iha kapitál Dili. Kuaze estraga populasaun barak nia sasán no ema balu mate.

To'o agora, tahu dodok kontinua nakonu iha estrada públiku, inklui instituisaun no populasaun balu nia-uma. 

Observasaun jornalista www.tempotimor.com, udan boot hamosu inundasaun iha kapitál Dili liu loron tolu ona, maibé nafatin sai preokupasaun boot tanba tahu sei nakonu iha Dili laran. 

“Ami rasik tenke hola inisiativa hodi ajuda hamoos tahu iha estrada no fatin balun iha ami nia fatin,” dehan Agus X. Da Costa (19), abitante Bidau, Segunda (16/3).

Iha parte seluk, estrada husi merkadu Bekora tama too ponte Kuluhun hafalun ho rai rahun nia-suar no mós hamosu engarrafamentu. 

Dalan husi Bekusi ba Taibesse taka ba transporte. Nunee, liu de'it mai ponte Merkadu Bekora no husi Ponte Maufelu ba ospitál taka ba transporte roda haat, só motór de'it bele.

"Tanba dalan balun taka maka hamosu engarrafamentu ne'e,” dehan Komandante PNTL Munisípiu Dili, Superintendente Xefe Armando Monteiro, via telefone. 

Oras ne'e daudaun Komandu PNTL orienta ona membru sira tuun ba terrenu hodi ajuda hamoos lixu iha eskola sira iha Dili Laran. 

Nune'e, oras ne'e daudaun funsionáriu barak sei preokupa hamoos tahu dodok ne'ebe sei nakonu no balu nafilak ba rai-rahun hodi aumenta preokupasaun ba populasaun hotu-hotu. 

Área ne'ebé daudaun preokupadu tebes mak Bekora, Bidau, Taibesse, Balide, Audian, Bairru dos Grillos, Kaikoli, Largo Lesidere, Bairru-Pité, Tasi-Tolu no inklui Palásiu Prezidensiál no fatin sira seluk tan. 

Entretantu, inundasaun ne'e, husik hela sofrementu ba kapitál Dili no oras ne'e daudaun funsionáriu seidauk hala'o serbisu hanesan baibain tanba sei preokupa hodi kontinua hamoos ida-idak nia fatin. 

Rekasiona ho situasaun ne'e, Konsellu Ministru deside fó toleránsia durante loron rua, hahú husi loron 17 to’o 18 Marsu 2020.

"Iha loron ne'e hotu-hotu partisipa iha asaun limpeza no rekuperasaun ba estragu sira ne’ebé provoka husi inundasaun ne’ebé akontese iha Sesta (13/3)", dehan Ministru Reforma Lejizlativu Asuntu Parlamentár (MRLAP), Fidelis Magalhães, hafoin reuniaun Konsellu Ministru estraordinariu, iha Palásiu Governu, Segunda (16/3). 

Toleránsia pontu ne’e aplika de’it ba Munisípiu Dili. Loron ne’e la’ós feriadu no la aplika ba funsionáriu sira ne’ebé presta fó serbisu esensiál sira, hanesan sira ne’ebé serbisu fó seguransa, tau matan ba área saúde, no protesaun sivíl.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.