Ministru Reforma Legislativu Asuntu Parlamentar (MRLAP) Fidelis Manuel Leite Magalhaes dehan, governu hasai ona desizaun ba kriasaun ekipa taks force refere.
"Desizaun ne'ebé ohin ami hasai relasaun ho inundasaun no situasaun emerjensia ne'ebé akontese iha munisipiu Dili, pontu primeiru atu aturiza kriasaun taks force entre Ministeriu Planaementu Investimentu no Estrateziku (MPIE) ho Ministeriu Obras Publikas (MOP) atu harii ekipa konjunta ida no sei lidera husi Diretor Jeral MOP ho partisipasaun husi Diretor Jeral ADN ho ninia ekipa," dehan Fidelis iha Palasiu Governu, Tersa (17/03).
Ministru ne'e dehan, orientasaun ba ekipa taks force mak atu finaliza lalais estimasaun kustus no aban tenke aprezenta ba Konsellu Ministru.
Aleinde ne'e, nia dehan, autoriza mós ekipa taks force atu identifika fatin ne'ebé nehetan estragus ho tipu ka modelu rekupera obras nian.
"Ohin Konselu Administrasau Fundus Infra-estrutura (CAFI) identifika mós fundus apropriadu hodi bele fasilita obras serbisu sira emerjensia nian, identifika katak sei rekore ba iha fundus kontizensia," nia esplika.
Nia hatutan, governu orienta mós ba ekipa taks force atu tuun imediatamente ba fatin afetadu sira.
"Desizaun ohin mós defini tipu serbisu mak hanesan normalizasaun, protesaun no limpeza i ba limpeza sei haree mós esforsu atu kontinua nafatin ajuda halo limpeza iha uma laran sira ne'ebé afeitadu," katak nia.