Justifikasaun ba PR Aseita Demisaun PM Taur mak Mudansa iha PN

Padre Julio Crispin Belo Padre Julio Crispin Belo Foto Suplai

Tempotimor (Dili)-To'o ohin loron Prezidente Repúblika Francisco Guterres Lu Olo seidauk foti desizaun ba pedidu demisaun ne'ebé Primeiru Ministru Taur Matan Ruak aprezenta ona. Tuir jurista Timor-oan ida, Pe. Julio Crispin, justifikasaun ida ba PR Lu Olo atu aseita pedidu demisaun PM mak mudansa iha kompozisaun meza Parlamentu Nasionál.

Pe. Julio dehan, PR Lu Olo buka dalan halo demisaun ba governu bazeia ba pedidu husi PM Taur, maibé PN mós presiza halo mudansa iha kompozisaun meza parlamentu hodi hatudu ba PR katak mosu ona forsa politika foun ne'ebé subtitui ona koligasaun tuan.

"Par hatudu iha parlamentu nasional ne'e iha maioria parlamentar, par iha fali koligasaun foun laos ida tuan, bainhira kompozisaun meza seidauk troka halo nusa mak bele dehan maioria foun i seidauk troka ne'e halo nusa mak fó resposta ba Prezidente (repúblika) ho governu katak koligasaun foun iha ona forsa politika foun?," dehan Pe. Julio ba tempotimor.com via telefone, Tersa (17/03).

Maske nune'e, Pe. Julio husu ba públiku atu hein de'it, bainhira PR konvoka ona Konsellu Estadu signifika nia prosesu loron ida ka rua bele fó sai ona.

Entretantu, iha 22 Fevereiru 2020, partidu politiku neen ne'ebé kompostu husi CNRT, PD, KHUNTO, PUDD, UDT no FM deklara formasaun koligasaun foun.

Koligasaun foun ne'ebé lidera husi CNRT ne'e aprezenta an ona ba PR Lu Olo.

Loron rua hafoin koligasaun foun ne'e eziste, iha 24 Fevereiru 2020 PM Taur ofisialmente hato'o ninia pedidu demisaun ba PR Lu Olo no indizita ona Primeiru Ministru foun.

"Atu hatama karta ida,  manifestasaun ho intensaun ba demisaun," deklara PM Taur hafoin hasoru-malu ho PR Lu Olo iha palasiu Prezidensial, Tersa (25/02).

Maske nune'e, to'o ohin loron PR Lu Olo seidauk foti desizaun ba pedidu demisaun ne'ebé PM Taur aprezenta no seidauk mós foti desizaun ba koligasaun foun.

Rate this item
(3 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.