Komunidade Labele Paniku, Governu Garante Nafatin Nesesidade Baziku

MRLAP Fidelis Magalhaes MRLAP Fidelis Magalhaes Foto Suplai

 

Tempotimor (Dili)-Governu husu ba komunidade sira atu labele paniku relasiona ho planu governu hodi husu ba Prezidente Repúblika atu dekreta estadu emerjensia relasiona ho pandemia Corona Virus 2019 (Covid-19).

Governu hato'o deklarasaun ida ne'e relasiona ho situasaun iha Lospalos, Munisipiu Lautem ne'ebé komunidade sira hahú hada'u-malu hodi sosa foos iha loja sira iha kapital Lospalos.

Lee mós: Komunidade Lospalos Hahú "Atak" Loja hodi Sosa Foos

Liu husi komunikadu imprensa ne'ebé tempotimor.com asesu iha Tersa (17/03), governu husu ba komunidade sira atu mantein kalma.

"Governu hakarak informa ba komunidade sira atu labele pániku relasiona ho planu Governu nian ne’ebé solisita ba S.E. Prezidente Repúblika atu dekreta Estadu Emerjensia relasiona ho pandemia Koronavírus ka Kovid-19," deklara komunikadu ne'e.

Komunikadu ne'e hatutan, objetivu husi Estadu Emerjensia mak atu limita de’it movimentasaun ema nian hodi evita sirkulasaun surtu Kovid-19, enkuantu importasaun sasán nesesidade báziku sira no medikamentu nian kontinua la’o hanesan baibain.

Liu tan, komunikadu ne'e dehan, governu liu husi Ministru Kordenadór ba Asuntu Ekonómiku, Fidélis Leite Magalhães iha Segunda (16/03) konvoka ona enkontru Jeral ida ho dirijente AIFAESA, CLN no Ajénsia Importadór sira, oinsá halo preparasaun di’ak atu asegura katak nesesidade báziku kontinua sírkula normal iha merkadu sira, no vida ekonomia kontinua la’o normal.

"Iha enkontru ne’e, CLN relata katak stock nasionál sei seguru hela, karik iha kazu nesesáriu tebes atu blokeiu, garante ekonomia rai-laran sei la’o aguenta to’o fulan 5 oin mai."

Aleinde ne'e, parte AIFAESA ho ajénsia importador sira sei halo kontrolu ne’ebé rigor ba armazén no loja sira atu nune’e evita importador ka loja na’in sira hasa’e folin.

"Komunidade ka komprador sira ne’ebé mak ba sosa sasán iha loja sira, karik haree folin la razoável, bele hato’o keixa ba parte kompetente hanesan Polísia ou AIFAESA atu sira bele tun intervein hodi fó sansaun ba loja nain refere, tanba Governu sei la tolera importadór ka loja na’in sira ne’ebé aproveita oportunidade buka lukru ba an rasik iha situasaun emerjensia nia laran."

Rate this item
(0 votes)
Last modified on Tuesday, 17 March 2020 14:45
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.