Koligasaun Foun Eziji PR Lu-Olo Labele 'Subar' Demisaun PM no Pedidu Forma Governu Featured

Tempotimor (Dili) - Porta-vós koligasaun foun preokupa Prezidente Republika, Fransisco Guteres Lú Olo, ne'ebé seidauk anunsia rezultadu ba pedidu demisaun Primeiru Ministru Taur Matan Ruak no pedidu koligasaun foun nian.

"Agora ita hotu-hotu preokupa, tanba daudaun hasoru hela situasaun ne'ebe governu ne'e inkompletu no governu ne'e dimensionáriu, maski Prezidente Repúblika sei tetu hela Primeiru Ministru ninia demisaun, maibe ida ne'e buat ida ne'ebe hatudu ona katak, governu la estavel hela, tanba tempu ida ba tempu seluk governu ne'e para ona", dehan Antonio da Conceição 'Kalohan', iha Tower Fatuhada, Sesta (20/3).

Nia hatutan, situasaun seluk mak agora preokupa ba moras Covid-19 ne'ebe afeta ba mundial, depois Timor nia kapasidade tékniku seidauk diak no rekursu finanseiru ho tan impase polítika ne'e tau ita iha situasaun ne'ebe vuneravél tebes.

"Tanba ne'e, Prezidente Repúblika bele tetu didi'ak saida mak nasaun hasoru no tempu ona para pronúnsia ona atu simu ka la simu, mas ida nonook de'it ne'e mak hanesan ita halo fila-fali buat ida inserteza mak ida ne'e", dehan Antonio.

Nia akresenta, situasaun agora obriga para hola medida politika ne'ebe tenkeser ho korajen atu halo no koligasaun prontu ba ida ne'e. (*)

Rate this item
(0 votes)
Last modified on Saturday, 21 March 2020 18:51
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.