"Kona ba pedidu deklarasaun Estadu Emerjénsia para limita ema nia situasaun liberdade, reuniaun no manifestasaun ke ne'e presiza deklarasaun Estadu Emerjénsia, ne'ebé Segundu (23/3), ha'u sei haruka ba Prezidente Repúblika, naturalmente depois reuniaun Konsellu Estadu no Defeza no Seguransa no sei haruka ba Parlamentu Nasionál para konfirma," dehan Taur, iha Otél Timor, Sabdu (21/03).
Xefe Governu fiar sei utrapasa situasaun emerjénsia rua hanesan dezastre naturais ne'ebé akontese rezulta kuaze populasaun inklui Infraestrutura no seluk mak Coronavirus Disease 2019 (Covid-19) ne'ebé daudaun ne'e konfirmadu ona iha suspeitu ida pozitivu.
Iha fatin hanesan, Sekretariu Jerál FRETILIN, Mari Alkatiri reforsa, atuál Timor-Leste iha situasaun pre-emerjénsia relasiona ho Covid-19 ne'ebé presiza tebes atu ema hotu sai kombatente atu kontribui ba luta kontra Covid-19, nune'e tenke dekreta ona Estadu Emerjénsia para fo kbiit ba Governu atu utiliza rekursu hasoru Covid-19.
"Ba ha'u iha tempu pre-emerjénsia ne'e tenke loke dalan ona ba emerjénsia, para VIII Governu iha kbiit trata asuntu ne'e, Ita ida-idak sai kombatente kontra Corona Virus," dehan Mari Alkatiri.
Entertantu, daudaun ne'e Ministériu Saúde deteta ona suspeitu ida ne'ebé relasiona ho Covid-19 hafoin rezultadu teste pozitivu. (*)