Sekretáriu Jerál Partidu FRETILIN, Mari Alkatiri esplika, mezmu ho 31 kadeira, maibé ho situasaun ne'ebé Timor-Leste enfrenta hanesan dezastre naturais, Covid-19 inklui impasse polítika ne'ebé naruk, loke espasu ba FRETILIN ho PLP hodi kontribui hasoru dezafiu hotu.
Eis-Primeiru Ministru esplika, presiza tebes Governu inkluzaun para hakuak hotu-hotu nem halo diskriminasaun ba partidu seluk, tanba ne'e ho asina nota entendementu husi FRETILIN ho PLP hanesan pasu primeiru loke dalan atu hakotu impase polítika.
"Ami FRETILIN ho PLP hahu deit ho votu 31, mas ha'u fiar katak aban bainrua forma duni IX Governu programa no orsamentu sei liu," dehan Alkatiri hafoin asina nota entendimentu, iha Otel Timor, Sábadu (21/3).
Eis-Primeiru Ministru ne'e esplika, razaun tanba partidu sira iha Parlamentu Nasional, inklui povu kole ona ho impase politika, nune'e partidu sé mak ukun tenke responde uluk povu nia-vida.
Alkatiri akresenta, entendimentu entre FRETILIN ho PLP hanesan pasu primeiru loke dalan atu hakotu impase politika no la'ós kontra natura tanba FRETILIN konsidera hanesan partidu ne'ebé primeiru mais votadu.
Iha fatin hanesan, Prezidente PLP, atual Primeiru Ministru, Taur Matan Ruak hatete, fiar solusaun sei iha hotu garante estabilidade governativa iha Parlamentu Nasionál.
"Intemdementu ne'e loke dalan, loke oportunidade para halibur kbiit, halibur esforsu para ajuda Prezidente Repúblika bele hetan solusaun. Tanba ne'e, hau fiar katak ita sei hetan solusaun mezmu ke ho difikuldade ne'ebé daudaun ne'e enfrenta," dehan Taur.
Entertantu, FRETILIN dadaun ne'e iha Parlamentu Nasionál hamutuk 23 deputadu no PLP 8 kadeiras, nune'e partidu rua ne'e hamutuk kadeira 31. (*)