Ministru Reforma Lejizlativu Asuntu Parlamentár (MRLAP), Fidelis Leite Magalhães hatete, funsionáriu sira bele hela iha uma, maibé labele taka telemovel atu kontaktu, bainhira iha servisu balun ne'ebe presiza halo.
"Primeiru Ministru fó instrusaun ba membru governu no instituisaun estadu sira atu hahú ona orienta ba funsionáriu sira hotu ne'ebe la'ós esensiál bele hela iha uma, sira ne'ebé esensiál mak mai servisu", dehan nia, hafoin reuniaun Konselu Ministru, iha Sentru Konvensaun Dili (CCD), Segunda (23/3).
Fidelis hatutan, hela iha uma la signifika feriadu, maibé iha uma mós tenke kontribui ba kombate Coronavirus Disease (Covid-19), la'ós hela iha uma para pasiar fali ba fatin sira seluk ho lakon responsablidade atu hada'et fali virus.
Ne'e duni, husu funsionáriu hotu-hotu kontribui ba esforsu hotu ne'ebé luta atu kombate Covid-19 ne'ebe hada'et hela. (*)