Hafoin Timor-Leste liuhusi Ministeiru Saúde Deteta ema ida pozitivu Covid-19, iha Sabdu (21/3), halo publiku hotu pániku iha ejizenia ba Estadu atu foti metode prevensaun Covid-19 liuliu aplika distansiamentu sosiál hodi aplika Estadu Emerjénsia.
Nune'e, ohin Governu hatoo ona pedidu Estadu Emerjénsia ba Prezidente Repúblika. Nune'e, tuir planu, Tersa (24/3), sei halo reuniaun Konsellu Defeza no Seguransa no Konsellu Estadu hodi responde prevensaun Covid-19.
"Prezidente Repúblika konvoka ho karáter urjénsia, membru hotu-hotu ne’ebé halo parte Konsellu Superior Defeza no Seguransa no Konsellu Estadu," haktuir konunikadu husi Gabinete Presidensial ne'ebé www.tempotimor.com asesu, Segunda (23/3).
Prezidente Repúblika, Francisco Guterres Lú Olo, mak sei prezide reuniaun Konsellu Superior Defeza no Seguransa no Konsellu Estadu hodi rona membru sira-nia hanoin kona-ba pedidu husi Governu atu deklara Estadu Emerjénsia.
Iha Karta ne'e hatete mos, Estadu Emerjénsia signifika sei iha medida ne’ebé sei limita ka supende direitu balun liberdade balun no garantia balun ne’ebé Konstituisaun fó ba sidadaun sira. Governu hanoin katak ho medida sira ne’e mak bele kombate no hamenus moras ne’e da'et husi ema ba ema, iha Timor-Leste.
"Governu propoin ona períodu fulan ida ba Estadu Emerjénsia," hakerek iha karta ne'e.
Prosesu atu deklara estadu Emerjénsia akontese hafoin Prezidente Repúblika rona ona opiniaun husi membrus Konsellu Superior Defeza no Seguransa no Konsellu Estadu no haree katak presiza halo duni deklarasaun Estadu Emejénsia, Prezidente Repúblika sei husu autorizasaun husi Parlamentu Nasionál, liuhusi mensájen ida. Karik Parlamentu Nasionál aprova, Prezidente Rpúblika sei deklara Estadu Emerjénsia liuhusi Dekretu Prezidensial.
Entertantu, partisipa iha reuniaun membru Konsellu Superior Defeza no Seguransa kompostu husi, Prezidente Repúblika Francisco Guterres Lú Olo, Primeiru Ministru Taur Matan Ruak, Ministru Negosiu Estranjeiru no Kooperasaun, Dionísio Babo, Ministru Defeza no Seguransa, Filomeno Paixão, Ministru Justisa, Manuel Carceres,
Reprezenta husi Parlamentu Nasionál, Aderito Hugo da Costa, David Dias Ximenes, Abel Pires da Silva, Xefe Estadu Maior Jeneral F-FDTL Lere Anan Timur, Komisáriu PNTL Faustino da Costa, Diretór Jerál Servisu Intelijénsia, Manuel Serrano, José Manuel Fernandes ‘Nakfilak’, Cristina da Silva no sei konvida Eis-Primeiru Ministru no Ministru, Saúde Rui Araújo no Infektolojista Danina Coelho no Diretór Ezekutivu FONGTIL, Daniel Santos.
Membru Konsellu Estadu kompostu husi Prezidente Repúblika Francisco Guterres Lú Olo, Primeiru Ministru Taur Matan Ruak, Eis Prezidente Repúblika sira, Prezidente Parlamentu Nasionál, Arão Noe, Oscar Lima, Alcino de Araújo Barris, Maria Dadi Soares Magno, Laura Soares Abrantes, Faustino da Costa.
Husi Parlamentu Nasionál: Eduardo de Deus Dusae’, Aurora Ximenes, José Cornelio Guterres, Árcangelo de Jesus Gouveia Leite, no José dos Santos ‘Naimori Bucar’. (*)