Hafoin konfirmadu Timor-Leste iha pozitivu ida moras Covid-19 Governu hato'o kedas pedidu Estadu Emerjénsia ba Prezidente Repúblika, Francisco Guterres Lu Olo, Segunda (23/03).
Hafoin simu pedidu ne'e, Tersa (24/3), Prezidente Repúblika konvoka kedas reuniaun Konsellu Superiór Defeza no Seguransa no Konsellu Estadu hodi responde ba ameasa Covid-19.
Remata enkontru membru Konsellu Defeza no Seguransa, Ministru Negósiu Estranjeiru no Kooperasaun (MNEK), Dionísio Babo Soares hatete, Estadu Timor-Leste mais sériu atu kombate Covid-19.
"La'ós sériu de'it, mais duke sériu," dehan Dionísio, iha Palásiu Prezidensiál, Bairru-Pité, Tersa (24/3).
Antes ne'e, Primeiru Ministru, Taur Matan Ruak hateten, bainhira situasaun Covid-19 obriga, TL sei taka aan ba mundu, "distansiamentu sosiál" bele aplika diretamente liuhusi dekreta Estadu Emerjénsia.
Partisipa iha reuniaun Konsellu Superiór Defeza no Seguransa husi, Prezidente Repúblika, Francisco Guterres Lú Olo, Primeiru Ministru, Taur Matan Ruak, Ministru Negósiu Estranjeiru no Kooperasaun, Dionísio Babo, Ministru Defeza no Seguransa, Filomeno Paixão, Ministru Justisa, Manuel Cárceres, Adérito Hugo da Costa, David Dias Ximenes, Xefe Estadu Maiór Jenerál F-FDTL, Lere Anan Timur, Komisáriu PNTL, Faustino da Costa, José Manuel Fernandes ‘Nakfilak’, Eis Primeiru Ministru no Ministru Saúde, Rui Araújo no Infektolojista, Danina Coelho no Diretór Ezekutivu FONGTIL, Daniel Santos. (*)