Australia no Komitementu ne'ebe Suli Nafatin hodi Apoiu Sofrimentu Povu TL

Bandeira Australia ho Timor Leste Bandeira Australia ho Timor Leste Foto Embaixada Australia

Tempotimor (Dili)-Governu no povu Australia kontinua hatudu sira-nia komitementu ne'ebé boot tebes hodi apoiu Timor Leste bainhira monu ba situasaun defisil.

Komitementu ida ne'e Australia hatudu liu husi ninia apoiu hodi responde ba problema inundasaun ne'ebé akontese iha Dili iha 13 Marsu liu ba. 

"Governu Austrália ho ksolok anúnsia katak sei kontinua tulun Timor-Leste ninia esforsu tomak responde problema  inundasaun  ne’e," deklara governu Australia liu husi komunikadu imprensa ne'ebé tempotimor.com asesu husi embaixada Australia iha Timor Leste, Tersa (24/03). 

Governu Australia promete sei apoiu montante orsamentu kuaze AUD500,000 dollar Australia nian, ne’ebé fornese liu husi Austrália nia Parseria Umanitária, inklui parseria ho ONGs sira hanesan CARE, Caritas, Oxfam, Plan no World Vision. 

"Austrália nia apoia fornese fundu finanséiru ba materiais asisténsia nian, hanesan konstrusaun, bee-moos, saneamentu no ijéniku no mensajen saúde públiku relasiona hó Virus-Corona (COVID-19)".

Iha ninia anunsiu, Embaixadór Peter Roberts hatete, “Ho laran tomak ami  hamriik hamutuk ho povu Timor-Leste iha tempu susar ne’e . Ami nia apoia sei tulun família hirak ne’ebé mak afetadu husi inundasaun, nune’e bele harii hikas sira-nia uma no tulun komunidade sira moris saudavel.” 

Austrália mós sei fornese materiál ijeníku no sanitária hamutuk 1,000 ba feto no labarik feto sira ne’ebé mak hetan impaktu husi inundasaun ne’e. Apoiu ne'e sei fornese liu husi UNFPA. 

"Ami-nia asisténsia sei entrega husi ami-nia parseiru sira – hala’o koordenasaun ne’ebé kle’an ho Governu Timor-Leste, liuliu Sekretáriu Estadu Protesaun Sívil".

Liu husi serbisu hamutuk ho Austrália nia Parseria Umanitária, Cruz Vermelha de Timor-Leste no Nasoins Unidas, Sekretariu Estadu Protesaun Sívil halo ona avaliasaun ba ema hamutuk 31,000 resin ne’ebé afetadu husi inundasaun. 

Governu Timor-Leste foti ona asaun hodi lidera atividade responde ba inundasaun ne’e no distribui ona materiál asisténsia ba família hamutuk 2,675 – ho apoia husi doadór oioin.

“Nu’udar belun di’ak no viziñu, Austrália sei kontinua serbisu hamutuk ho Timor-Leste,” dehan embaixadór Peter.

Rate this item
(0 votes)
Last modified on Wednesday, 25 March 2020 08:52
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.