Asaun husi deputadu CNRT, PD, KHUNTO, PUDD, UDT no FRENTE Mudansa iha Parlamentu Nasionál, Tersa (25/03), hatudu momoos katak, partidu hirak ne'e preokupa liu oinsa atu kaer ukun la'os oinsa atu salva povu Timor-Leste husi ameasa virus ne'ebé mosu ona iha ita-nia matan laran.
Bainhira halo votasaun ba pedidu governu nian ba alterasaun Lei Jestaun Finanseira, deputadu husi CNRT no nia aliadu sira, deside hodi vota kontra. Deputadu sira ne'e mós "boikota" PR Lu Olo atu deklara estadu emerjensia relasiona ho ameasa Corona Virus Diasses 2019 (Covid-19).
Relasiona ho ida ne'e, Bankada FRETILIN no PLP iha Parlamentu Nasionál deklara katak, CNRT ho nia aliadu sira ne'ebé molok ne'e liu husi konferensia imprensa hanaran an Aliansa Maioria Parlamentar (AMP) foun, prefere liu atu halo tentativa asaltu ba poder hodi hatuun governu duke buka dalan hodi fó apoiu ba governu atu kombate Covid-19.
Bankada FRETILIN ho PLP kestiona mós deputadu AMP foun ne'ebé hili liu atu ba tuir konferensia imprensa hodi fó presaun ba PR Lu Olo duke hola parte iha sesaun plenaria hodi salva nasaun no povu.
Liu husi deklarasaun iha sede CNRT iha Tersa (25/03), Porta voz AMP foun no Sekretariu Jeral Partidu Demokrátiku, Antonio Conceição, deklara katak sira-nia koligasaun foun ne’e hakarak atu Prezidente Repúblika aseita ona Primeiru Ministru nia pedidu demisaun no loke ona dalan ba formasaun Governu.
"Deklarasaun ne’e, porta voz koligasaun foun hala’o iha sede nasional partidu CNRT nian iha Dili, iha oras ne’ebé tuir loloos sira-nia deputadu sira mai iha parlamentu nasional hodi hola parte iha sesaun plenaria atu vota ba proposta lei ida ne’ebé governu hatama mai parlamentu nasional atu halo Terceira Alteração ba Lei Nú. 13/2009, de 21 de Outubro, Sobre Orcamento e Gestão Financeira. Governu halo pedidu atu Parlamentu Nasional hala’o prosesu ida ne’e ho karakter urjensia", deklara bankada FRETILIN no PLP.
Ida ne'e, bankada FRETILIN no PLP konsidera hatudu momoos katak CNRT hakarak atu hadau de'it poder husi Governu ida ne’ebé sei halo hela esforsu no presiza apoiu tomak husi Parlamentu Nasional atu bele kombate hasoru Covid-19 ne’ebé oras ne’e kria pandemia mundial, no ameasa hela povu Timor-Leste no Timor-oan rihun ba rihun ne’ebé sofre konsekuensia husi inundasaun semana hirak liu ba iha Dili.
"En vez de fo’o apoiu ba governu atu iha kapasidade ba hola medidas importante sira, CNRT interese liu atu hamonu governu iha tempu ida ne’ebé povu hasoru hela problema boot. Que tristeza!".
Bankada FRETILIN no PLP lamenta mós tanba koligasaun foun ida ne’ebé CNRT obriga-an atu harii, ne’ebé seidauk hatudu prova iha Parlamentu Nasional katak sira iha duni maioria no seidauk mós prienxe rekejitu sira ne’ebé Prezidente da Repúblika husu ba sira atu prienxe, obriga orgaun soberanu sira atu hakruk ba sira-nia tentativa atu hada'u poder husi Governu Konstitusional ida.
"At liu tan, CNRT hakarak atu obriga Prezidente da Repúblika atu demite lalais tiha VIII Governu Konstitusional maske sira hatene hela katak Prezidente da Repúblika halo hela esforsu, hamutuk ho VIII Governu, atu buka dalan ne’ebé mak adekuadu liu ba asegura ita-nia povu no ita-nia rai husi ameasa virus Corona nian".
Tentativa Sabotajen
Bankada FRETILIN no PLP deskonfia mós katak iha tentativa sabotajen ne'ebé CNRT ho nia aliadu sira halo.
Iha Segunda (23/03) kalan, tuir loloos deputadu sira atu vota ona iha plenaria PN ba pedidu husi governu atu altera lei Orsamentu no Jestaun Finanseira ho karakter urjenti. Maibé derepenti deit eletrisidade mate.
"Ne’e tentativa sabotajen ida tanba eletresidade mate de'it iha sala plenaria laran, enkuantu iha diresaun seluk Parlamentu nian eletresidade lakan normal, ne’e primeira vez akontese ho intensaun sabotajen, ami husu atu iha investigasaun sériu ba kazu ida ne’e!."
Deskonfiansa ne'e sai boot liu tan, tuir bankada rua ne'e, bainhira Prezidente PN adia votasan ba Tersa (24/03), maibé deputadu sira husi AMP foun ba hala'o fali konferensia imprensa.
"Ida ne’e inadmisivel, no hatudu momoos katak sira interese de'it atu hada'u ukun, atu sira bele kontrola sistema sira ne'ebé visiado ona no atu bele halo manipulasaun tuir sira-nia hakarak no gostu".
"Ida ne’e hatudu mós katak sira laiha interese atu kontribui atu proteje ita-nia populasaun husi virus corona, ka atu ajuda vitima sira husi dezastre inundasaun ne’ebé akontese iha loron-13 fulan- Marsu liu ba".
Asaun hirak ne'e, tuir FRETILIN ho PLP, hatudu aktak, CNRT prefere liu asalta poder iha tempu agora duke hamutuk ho governu buka solusaun ba problema surtu Covid-19.
"CNRT fila kotuk ba pedidu Governu atu altera Lei sobre Orsamentu no Jestaun Finanseira ho argumentu katak ida ne’e la urjente no hanesan fo’o 'Cheque em Branco' ba Governu. Enkuantu uluk sira mak halo alterasaun ho urjente ba Lei Atividades Petrolífera no Lei Fundu Petroliferu atu fo Cheque em Branco ba kompaña Timor Gap hodi asesu ba Fundu Petroliferu livremente".
Tuir bankada rua ne'e, iha tempu no situasaun daudauk ne'e, Governu presiza apoiu hotu-hotu atu ultrapasa, la’os haree fali situsaun ne’e hanesan oportunidade atu hadau ukun no manipula sistema atu bele fó benefisiu ba grupu balun de'it.
"Ami husu atu povu tomak matan moris neon-nain, atu labele husik aliansa foun ida ne’e aproveita fali situasaun iha ne’ebé ita-nia nasaun hasoru hela ameasa boot husi virus Corona, no ami apela ba povu Timor-Leste tomak atu labele husik sira halo presaun ba orgaun soberanu seluk ho intensaun de'it atu hada'u poder", deklara bankada rua ne'e.
