Bankada CNRT husu PR Lu Olo Rezolve Imediatu Estatutu Governu Atual

Deputadu Parlamentu Nasional husi bankada CNRT, Aderito Hugo da Costa Deputadu Parlamentu Nasional husi bankada CNRT, Aderito Hugo da Costa Foto suplai

Tempotimor (Dili)-Deputadu husi Bankada Congreso Nacional Reconstrução Timorense (CNRT) Adérito Hugo da Costa husu ba Prezidente Repúblika (PR) Francisco Guterres Lú-Olo atu rezolve imediatu estatutu governu atual hodi bele fó fatin ba governu foun mosu no aprezenta proposta orsamentu foun.

Tuir Hugo PR Lu Olo presiza haree ona ida ne'e tanba Primeiru Ministru Taur Matan Ruak mós hato'o ona ninia pedidu demisaun ba PR.

"Rezolve estatutu governu atuál ho imediatu, aprezenta proposta orsamentu foun husi governu foun, governu see see de'it ne'ebé atu forma, aprezenta proposta mai par ita lalika sobu lei sira ne'ebé ke tuir loloos ita la presiza book, lei sira ne'ebé ke iha situasaun anteriór bele guia hela ita hodi ultrapasa situasaun sira ne'e, mais ohin loron ita dehan fali labele," dehan deputadu CNRT iha plenaria PN, Kuarta (25/03/2020).

Deputadu ne'e mós haruka governu atu husu ba PR hodi define estatutu governu atual, tanba ida ne'e mak kontrubui ba rezolve impase polítika.

"Governu mós bele husu ba Prezidente Repúblika katak atu rezolve problema rai laran mak define lalais estatutu governu agora ne'e. Señor PM Taur Matan Ruak mós hato'o ona karta demisaun ne'ebé señor PR seidauk halo andamentu ba karta ne'e, pelumenus foti ona andamentu par ita foti ona solusaun ba governu foun ida mai no aprezenta ona ninia orsamentu," afirma Hugo.

Tuir deputadu Hugo, orsamentu duadesimál ne'ebé revé to'o fulan Outubru 2020 ne'e baralla normas hotu.

"Ne'ebé ita lalika mai hananu iha plenária PN hodi duun ba malu. Ne'ebé ami-nia ezijensia mak ezije ba PR atu define lalais estatutu governu agora ne'e, ida agora".

Iha fatin hanesan, Prezidente Bankada FRETILIN Aniceto Longuinhos Guterres dehan, CNRT ezije PR defini estatutu governu atual tanba CNRT nia intensaun mak poder de'it.

"Ita sei kestiona nafatin estatutu governu nian ne'e, tanba de'it Primeru Ministru aprezenta ona nia karta demisaun ne'e, mais ita buka took, tanba ita boot sira-nia asesóres, konsilleirus no jurista sira iha timor ne'e kalan-kalan ko'alia iha televizaun, ne'ebé bolu sira ajuda buka took iha kosntituisaun, iha ne'ebé mak ko'alia governu dimensionáriu par ita bele hatene katak governu dimensionáriu ne'e laiha autoriedade par hola inisiativa ruma," dehan Aniceto.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.