"Husu ba governu tenke tau atensaun ba fronteira terestre husi mota-ain to'o iha Sanerin, Atabae. To'o ohin loron ema halo movimentasaun 'jalan tikus' ne'e," dehan deputadu bankada CNRT Aderito Hugo.

Maske nune'e, Hugo apresia serbisu husi ajente sira ne'ebé hala'o ona médida prevensaun mezmu TL seidauk deklara estadu emerjénsia.

"Parte husi Ospitál, klínika, sentru saude sira, Polisia husi fronteira to'o mai aeroportu no portu sira, alfándega, migrasaun inklui Ministériu Negósiu Estranjeiru no Kooperasaun (MNEK) nia funsionáriu sira kontinua kontaktu movimentu timoroan nian atu tama mai Timor-Leste, ne'ebé hahú husi loron 20 marsu fó karatntina obrigatóriu la'o efetiva to'o ohin loron, ne'e ita nia apresiasaun aas tebtebes ba sira," dehan Hugo.

Iha fatin hanesan, deputadu bankada FRETILIN Fabião de Oliveira dehan, governu tenke tau atensaun ba fronteira entre Indonézia no Timor-Leste.

"Governu tenke tau atensaun maka'as ba fronteira entre Timor-Leste no Indonézia par ema labele tama ba-mai, tanba ita hatene katak ohin loron númeru Corona Virus ne'e sa'e maka'as ona," dehan nia.