Xefe Governu ne'e dehan, estadu emerjensia aplika tanba preokupasaun nasaun nian atu kombate Corona Virus Deasses 2019 (Covid-19).
Iha ninia implementasaun, PM Taur hatete, la'os bandu total sidadaun sira atu la'o, maibé evita de'it movimentu sidadaun nian ne'ebé la nesesariu.
"Movimentu sei limita, maibé medidas sira tuir evolusaun situasaun nian, la'os ita dehan labele par labele la'o ona lae, kuandu presiza ba ospital ou klinika no ba sosa sasan bele ba nafatin," dehan PM Taur iha parlamentu nasional, (26/3).
Bainhira nesesidade importante, nia hatete, bele halo movimentu, maibé sei iha regras atu halo tuir atu labele ba halibur malu iha fatin ida no ikus mai bele hadaet virus ba malu.
"Sei iha regras hodi la'o tuir par labele ba halibur malu depois kontajia virus ba malu, liu-liu sira ne'ebé suspeitu bele kontanjia ba seluk-seluk, mais medidas sira ne'e hotu sei fó hatene".
Kona-ba desizaun PN nian, Xefe Governu ne'e dehan, PN autoriza ona no sei haruka ba Prezidente Repúblika hodi bele deside bainhira mak hahú implementa no bainhira mak remata.
Taur dehan, governu prepara ona kondisaun hotu-hotu, liu-liu ba nesesidade sidadaun hotu-hotu, durante implementasaun estadu emerjensia.