Ministru Defeza no Seguransa no Ministru Interiór interinu Filomeno da Paixão de Jesus husu ba Timor-oan tomak iha teritoriu nasionál atu kumpri desizaun estadu emerjensia nune'e parte seguransa sira labele viola direitus umanus.
Tuir Paixão, fasil liu ba PNTL no F-FDTL atu la viola ema-nia direitu bainhira kada sidadaun hakruuk ba desizaun ne'ebé estadu foti ona.
"Fasil liu atu PNTL no F-FDTL labele viola komunidade nia direitu, importante mak sira kumpre, kuandu kumpre laiha ema ida mak bele book sira," dehan Ministru Filomeno iha Komandu Jerál PNTL Kaikoli, Sesta (27/03/2020).
Tan ne'e, nia afirma, di'ak liu sosiedade sira kumpre de'it saida mak estadu haruka.
"Di'ak liu mak kumpre, buat ida kumpre ne'e di'ak ba ita hotu, imi haree de'it mensajem Italia nian ne'e, tanba de'it lakohi kumpre ne'e mak virus ne'e daet to'o ema atu mate hotu, ne'ebé ita-nia foin ida ne'e di'ak liu ita kumpre," Ministru ne'e hus.
Iha fatin hanesan, Komandante Jerál PNTL Faustino da Costa afirma, atu labele iha violasaun direitus umanus, di'ak liu populasaun hotu hakmatek.
"Atu labele iha violasaun direirus umanus, husu par ida-idak hakmatek iha nia fatin, tanba moras ne'e mai la haree o riku ka ki'ak, boot ka kiik, tanba ne'e di'ak liu hakmatek iha uma hamutuk ho familia.
"Tanba moras ne'e mai mak hasees membru familia husi uma laran ne'e susar, se nia di'ak ita hasoru malu fali, maibé se la di'ak ita la hasoru malu tan," dehan Komisariu Faustino.