Primeiru Ministru Taur Matan Ruak hatete, governu esforsu hodi prepara fatin izolamentu no kuarantena maibé sei mosu nafatin preokupasaun husi Timor-oan balun.

Tan ne'e, nia dehan, governu tetu hela posibilidade balun atu suspeitu Covid-19 karantina de'it iha idaidak nia uma.

"Governu sei esforsu para hadi'a kondisoens karantina sira ne'ebé ladun di'ak, mais ami mós haree alternativu seluk. Ezemplu karantina bele iha de'it sira (suspeitu Covid-19) nia uma, maibé sira labele hela ho sira-nia familia no médiku sira chek sira beibeik, tanba dala-ruma sira hanoin fali ba kondisoens, sira bele kontasioza fali ho sira nia familia," dehan PM Taur Matan Ruak iha Palásiu Prezidensiál Bairro-pite, Sesta (27/03/2020).

Relasiona ho preokupasaun balun kona-ba kondisaun kuarentena ne'ebé governu estabelese, PM Taur dehan, loloos sira ne'ebé hela iha karaktina preokupa uluk sira-nia vida, la'os preokupa liu mak kondisaun kuarentena.

"Loloos ne'e, tempu hanesan ne'e sira labele preokupa ba kondisoens, ha'u hela iha otel ka oinsa, lalika preokupa, primeiru mak o nia moris, seguransa ba saúde, pois mak buat seluk. Se ita preokupa uluk buat seluk, ita espoin uluk ita-nia vida, ne'e susar," dehan PM.

Nia afirma, governu tau iha karantina tanba lakohi virus daet ba familia, karik ema sira ne'e iha sintomas Covid-19.

"Tanba saida mak governu tau hanesan ne'e, se liu-liu sira ba sira nia familia, mak nia la kuidadu nia bele kontazia ba familia kada loron, tanba iha nasaun seluk familia tomak taka tiha, entaun ami nia preokupasaun mak ne'e para iha kontrolu ida ne'ebé di'ak, maibé mós haree ba esperiénsia nasaun boot sira katak, tanba governu haree ba karantina nia kondisaun la sufisiente ne'e mak nasaun tomak lockdown," dehan PM Taur.