PR Lu Olo dehan, situasaun ohin loron hanesan mós ho tempu luta ba libertasaun nasional, tan ne'e Timor-oan tenke fó liman ba malu hodi hasoru inimigu foun, Covid-19.

"Hamutuk ita tenke fó apoiu ba Governu hodi implementa medidas ne’ebé efetivu atu antesipa vírus ida ne’e labele da’et  ba beibeik no nune’e, proteje  ita-nia Povu! Ita tenke reforsa Governu oinsá de’it, iha tempu ne’ebé de’it!."

Tan ne'e PR Lu Olo aviza ba partidu politiku hotu-hotu atu tau sees lai diferensia politika no fó liman ba malu nu'udar kombatente ida de'it hasoru Covid-19.

"Ha’u husu ba partidu polítikus,  líderes, kuadrus no militantes hotu-hotu atu tau sees lai diferensas polítikas, hodi fó liman ba malu, nu’udar kombatente ida de’it hasoru moras aat ida ne’e,".

"Ita hotu-hotu tenke halo refleksaun kle'an saída mak bele akontese aban ba ita, nu’udar timoroan, iha situasaun difísil ida ne’e. Liu husi Parlamentu Nasional nia autorizasaun, ha’u dekreta Estadu Emerjénsia ne’e hatudu sinal pozitivu tebetebes ba ita-nia solidariedade institusional iha luta ida ne’e hodi defende ita-nia Povu. No husi sorin seluk,  Timor-Leste,  biar Nasaun kiik, ita fó mós solidariedade kombativa internasional hodi luta hamutuk hasoru moras aat COVID-19, nu’udar umanidade nia inimigu," dehan nia.

Kona-ba medida espesífiku liu, PR Lu Olo dehan, durante períodu estadu emerjénsia, sei define husi governu ho apoiu husi órgaun soberania hotu-hotu.  Governu ninia susesu depende ba kolaborasaun husi sidadaun ida-idak no husi ema hotu.

"Luta ne’e ita-nian hotu. Hamutuk ita sei manán koronavírus ho ita-nia matenek organizadu,  nu’udar povu ida de’ it, ho hakarak ida de’it. Moris saudável no ho liberdade tomak maibé nu’udar sidadaun responsável ne’ebé hatene valór  domin no respeitu entre ita hotu, iha ita-nia Timor-Leste livre no independente."

Tan ne'e, PR husu atu povu tomak hamutuk hasoru lisuk Covid-19.

"Mai hamutuk proteje ita-nia an, ita-nia família no ita-nia Povu!," PR Lu Olo apela.