Ministru Reforma Administrativu Asuntu Parlamentar, Fidelis Leite Magalhães liu husi ninia pajina facebook Fidelis Leite Magalhaes, fó iis balun kona-ba regras iha estadu emerjensia.
Liu husi ninia pajina facebook ne'e, Fidelis hatete iha estadu emerjensia atividade hirak ne'ebé envolve ema barak sei suspende hotu.
"Transporte público sira sei para lai. Jogos desportivos sira, festa sira, ransu grupo sira para lai. Mate uma sira mós máximo ema na'in 10 de'it," dehan Ministru Fidelis iha ninia pajina facebook, Sabadu (28/03).
Aleinde ne'e, Fidelis dehan, durante estadu emerjensia sei autoriza nafatin vendedór ambulante sira, loza no merkadu sira hodi faan nesesidade ne'ebé komunidade presiza, maibé tenke tau regra hanesan fase liman, distansia ho ema kada metru, labele tama ka hein nadodok no tenke uza maskara.
"Sei autoriza vendedor ambulante sira, loja no mercado sira fa’an necessidades moris atu loke, maibe tenke impõe regras hanesan fase liman, distância ho ema cada metro, labele tama ka hein nadodon, tenke tau mascara. Em jeral tenke assegura requisitos e preocupações hygiene nian," ministru ne'e hakerek.
Nia afirma, ema ne'ebé hakarak ba sosa sasan labele ba pasiar ka dada lia iha loza. Bainhira sosa sasan tenke fila kedan ba uma.
"Labele passear ba loja sira ka dada-lia iha loja sira. Hola tiha fila kedan ba uma. Labele ba mercado em grupo," dehan Fidelis.
Regra hirak ne'ebé sei estabelese, Ministru ne'e hatete, governu sei kontinua halo avaliasaun kada loron.
"Sei halo bebeik avaliasaun kuaze loro-loron ba regra sira ne'e hotu," nia hakotu.