Print this page

Posibilidade Trabaladór Timor-oan 1.200 iha Australia sei La Fila

Primeiru Sekretariu Embaixada Timor Leste iha canberra, Samuel So'ares foto hamutuk ho serbisu na'in Timor oan sira (seasonal workers) iha Mornington Peninsula, Victoria Australia(6/11/2019) Primeiru Sekretariu Embaixada Timor Leste iha canberra, Samuel So'ares foto hamutuk ho serbisu na'in Timor oan sira (seasonal workers) iha Mornington Peninsula, Victoria Australia(6/11/2019) Foto Embaixada Canberra

Tempotimor (Dili)-Trabaladór Timor-oan na'in 1.200 mak daudauk ne'e sei iha hela Australia. Iha posibilidade atu sira mantein hela iha ne'ebá.

Embaixada Timor-Leste iha Australia daudauk ne'e esforsu hela atu bele konvense governu federal Australia atu bele extende vistu trabaladór Timor-oan sira ne'ebé serbisu iha Australia.

Sekretariu dahuluk embaixada TL iha Canberra, Australia, Samuel Soares hatete, daudauk ne'e trabaladór Timor-oan ne'ebé sei hela iha Australia hamutuk na'in 1.200.

Trabaladór hirak ne'e, nia dehan, balun ninia kontratu serbisu sei falta fulan ida no seluk sei falta fulan rua.

Daudauk ne'e, nia hatete, nia parte sei hala'o diskusaun ho departamentu ne'ebé toma konta kona-ba trabaladór no ajensia sira ne'ebé halo kontratu ho trabaladór sira hodi buka solusaun balun.

Iha diskusaun ne'ebé halo, nia dehan, diskuti oinsa atu antisipa karik Covid-19 kontinua afeta to'o tinan 2020 nia rohan, ka to'o Outubru ka Novembru.

Karik mosu duni hanesan ne'e, nia hatete, toos-nain sira iha Australia sei hasoru difikuldade atu hetan trabaladór ne'ebé bele serbisu iha sira-nia toos.

"Entaun sira hanoin atu bele ka lae sira halo mudansa iha Lei ne'ebé kona-ba serbisu nian par fó autorizasaun ba trabaladór ne'ebé atu remata sira-nia serbisu bele mantein, maibé sira mobiliza ba fali toos seluk," dehan Samuel ba tempotimor.com, Domingu (29/03).

Nia dehan, karik parte Australia bele foti desizaun hodi estende trabaladór Timor-oan sira-nia vistu atu nune'e sira bele hela nafatin.

"Lalika haruka sira fila tanba ita la hatene sira bele mai fila fali ka lae".

Ba asuntu ne'e, nia hatete, governu Australia mak tenke deside.

"Se kazu Lei ne'e la muda, entaun iha tan opsaun seluk mak sira bolu dehan espesial stay visa. Obsaun ne'e so ba temporariamente atu lalika husik traballador sira ne'e fila, tanba sira antisipa katak traballador sira fila mak la mai fali sira-nia bussines ne'e bele rugi, tanba lockdown husi aviun internasional mós la tama, entaun ne'e defisil".

Rate this item
(2 votes)
Last modified on Sunday, 29 March 2020 16:24
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items