Ministru Fidelis hatete, gabinete ne'e importante hodi hafasil kordenasaun nune'e bele ultrapasa situasaun emerjensia.
"Metodu ne'ebé ohin husi gabinete jestaun krize halo tuir sistema dekretu Lei ne'ebe hatur tiha ona kona-ba bainhira tama krize karik ita presiza instituisaun atu ajuda ita bele ultrapasa krize ne'e, i bele kordena esforsu hotu durante krize ne'e oinsa," dehan nia hafoin reuniaun Konselu Ministru iha Sentru Konvensaun Dili, Domingu (29/03).
Ministru dehan, metodu importante no sai nu'udar xave husi gabinete ne'e mak reforsa liña kordenasaun.
"Kordenasaun, tanba kuandu iha tempu krize lideransa prinsipal estrateziku ne'e iha Primeiru Ministru, entaun presiza iha gabiete ida serbisu entre interdepartamental atu ajuda Primeiru Ministru hodi bele trasa tomak desizaun estratezika i bele operasionaliza desizaun ne'ebe hatur tiha ona."