Login to your account

Username *
Password *
Remember Me

Embaixadór TL iha Xina Suspeitu Covid-19

Sekretariu Jeral MNEK, Jorge Trindade Neves Camoes iha Briefing ba Diplomata Asean sira iha Dili iha Tinan kotuk Sekretariu Jeral MNEK, Jorge Trindade Neves Camoes iha Briefing ba Diplomata Asean sira iha Dili iha Tinan kotuk Foto File

Tempotimor (Dili)-Embaixadór Timor-Leste ba Republika Popular Xina daudauk ne'e sai suspeitu ba Corona Virus Deasses 2019 (Covid-19).

Sekretariu Jeral Ministériu Negosiu Estranjeiru no Kooperasaun Jorge Camões informa, embaixadór TL ba Xina daudauk ne'e iha hela fatin observasaun tanba deskonfia Covid-19.

"Ita-nia diplomata hamutuk rua mak moras hela. Mais (Embaixadór ba Xina) seidauk deteta afeitadu moras Covid-19 ka lae. Nune'e agora internadu iha hela fatin observasaun no ate agora ho kondisaun di'ak," informa Sekjer MNEK ne'e ba www.tempotimor.com, Segunda (30/03).

Lee mós: Embaixadór TL ba Filipina Pozitivu Covid-19

Molok ne'e, Sekjer MNEK informa katak diplomata TL ida ne'ebé hala'o serbisu iha Filipina pozitivu Covid-19.

Daudauk ne'e, diplomata refere hala'o hela tratamentu intensivu iha fatin izolamentu.

Tuir informasaun husi parte Saude Xina hateten total numeru kazu Covid-19 konfirmadu pozitivu hamutuk 81,470, ema ne'ebe konsege rekopera ona hamutuk 75,770 no ema mate hamutuk 3,304.

Entretantu, hatan kona-ba asaun saida mak governu TL halo hodi tau-matan ba diplomata TL sira iha rai li'ur, estadu TL iha obrigasaun atu tau-matan ba nia ema sira bainhira hasoru problema saúde.

MNEK, nia dehan, kontinua observa no tenta buka meius oinsa par bele salva diplomata sira ne'ebé afetadu.

"Bainhira ita haruka ema ida ba hala'o serbisu iha rai li'ur i nune'e mós ninia familia sira ne'ebé ita haruka ba iha ne'eba, estadu tenke tau-matan, tanba ne'e Lei funsaun publiku preve ou garante," dehan nia.

Kona-ba serbisu reprezentante TL iha rai li'ur, Jorge dehan, MNEK hasai ona sirkular ba Xefe Misaun, Konsuladu no Konsuladu Jeral TL iha rai li'ur atu hala'o serbisu depende ba situasaun ne'ebé dezenvolve iha kada nasaun ne'ebé sira hela ba.

"Ita mós fó fleksibilidade ba ita-nia diplomata sira ou xefi das misoens atu haree, se iha nesesidade atu halo serbisu iha uma, ne'e sira rasik deside atu serbisu iha uma, la presiza ba fatin embaixada."

"Entaun ne'e ita fó fleksibilidade ba Xefe misoes, Konsul no konsul jeral sira atu haree saida mak sira presiza halo i deside depois informa mai, ne'e ita fo flexibilidade ba sira ida-idak depende ba situasaun ne'ebe dezenvolve iha nasaun ne'eba," dehan nia.

Iha Italia, nia dehan, embaixada TL ba Vatikanu no Nova Iorke daudauk ne'e halo serbisu husi uma.

"Ba sira seluk ha'u seidauk hatene didi'ak, maibé ha'u hanoin sira barak mak deside ona halo serbisu husi uma," dehan nia.

Ho ameasa boot husi Covid-19 ba nasaun hotu-hotu iha mundu, nia dehan, MNEK kontinua observa no tau-matan didi'ak ba diplomata TL iha rai li'ur.

"Ministeriu halo hela ezersisiu atu haree took saida mak atu halo, mais pur enkuantu ita fó kbiit ho kompetensia ba Xefi misoens sira haree i relata mai iha Sede Sentral saida mak akontese no presiza foti iha ne'ebá," dehan nia.

Rate this item
(2 votes)
Last modified on Tuesday, 31 March 2020 08:52
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter