Tan ne'e, deputadu ne'e husu atu Parlamentu Nasionál aprova ona pedidu levantamentu husi governu nune'e governu bele ezekuta iha semana ne'e nia laran.
"Povu agora hein ne'e mak agora atende lalais corona virus ho inundasaun ho karatér emerjénsia, entaun ha'u hanoin katak ita bele aprova ona par ezekusaun semana ne'e la'o ona, labele hein kleur, tanba ne'e orsamentu ida ne'e koloka duni ba Covid-19, la'ós gasta fali ba buat seluk," dehan Assanami iha plenaria PN, Kuarta (01/04).
Iha fatin hanesan, deputada Bankada KHUNTO Olinda Guterres husu governu uza orsamentu tokon $250 hodi atende imediatu situasaun ne'ebé povu hasoru daudauk.
"Preokupasaun povu nian ne'e ita haree uluk lai ida ne'e. Ne'ebé ha'u husu atu uza osan tokon $250 ne'e hodi atende imediatu ba povu nia situasaun, tanba virus corona povu balun tuur ho matan-been tanba sasan la folin no seluk tan," dehan Olinda.
Entretantu, deputadu husi bankada FRETILIN Antoninho Bianco hatete, tempu ona orgaun soberanu sira atu halo reflexaun.
"Tempu ona ita halo reflexaun ba ita-nia moris, orgaun soberanu tenke halo ona reflexaun ba moris ne'e. Se ita reprezenta duni povu, halo reflexaun sofrimentu ba mundu no ba povu ne'e, tanba ida ne'e mak prinsísiu ne'ebé regula ita iha ohin loron," dehan deputadu ne'e.