Maijor Jeneral Lere dehan, se koalia kona-ba orsamentu, bainhira ema laiha liu osan, pasensia nia bele mate ho kiak. Maibé, se iha osan bele foti hotu hodi salva ema vida.
"Ha'u hanoin katak kona-ba orsamentu, (se) ita kiak liu ne'e oin seluk, mate ho kiak, maibé se ita iha osan, bele foti buat hotu ne'ebé iha ona mala kidun ne'ebá, bele foti hotu mak morís, ida ne'e mak importante," dehan Lere hafoin hasoru-malu ho Prezidente Repúblika Franciso Guterres Lu Olo iha palasiu prezidensial Bairo-pite, Kuarta (01/04).
Tuir Lere, ema labele hanoin osan liu fali nia saúde, tan ne'e se osan iha, foti hodi salva vida.
"Dalaruma ha'u halo komparasaun ida embarazada balun moras, ha'u dehan ba sira 'o labele hanoin osan liu fali o nia saude', osan iha foti atu salva ita-nia vida ne'e mak importante".
Lere preokupa mós kona-ba diskusaun lider sira ne'ebé la halo asaun lalais tanba sei preokupa ho lei.
"Diskuti ba-mai lei. Ita hein lei maibé ita-nia ema mate lorloron ne'e lei la halo buat ida, tanba ita ema mak halo lei, laos lei mak halo ema, ne'ebé ha'u hanoin katak osan ne'e hira tenke ho transparensia ho koerensia no tenke hasai osan ba haree povu nia moris, ida ne'e mak importante liu," katak nia.