Kapitaun Mar no Guerra, Pedro Klamar Fuik hatete, medidas ne'ebé governu hasai iha estadu emerjensia ne'e benefisia ema hotu-hotu.
Daudauk ne'e, nia dehan, sei iha faze inisiu no bainhira iha evolusaun drastika ba kazu Covid-19 sei halo mós mudansa ba medidas ne'ebé iha.
"Ita sei iha faze inisial, se tuir dadus ne'ebé ita-nia ekipa teknika Ministériu Saúde aprezenta iha evolusaun drastika, medidas mós sei muda," dehan Pedro iha Kuartel Gabinte Jestaun Krize, Sentru Konvensaun Dili, Sesta (03/04).
Pedro rekoñese katak daudauk ne'e movimentu populasaun nian iha fatin públiku sei barak tebes, tan ne'e nia apela atu kontinua kumpre regras ne'ebé fó sai ona.
"Forsa FALINTIL-FDTL i PNTL ne'ebé ezekuta orden durante estadu emerjensia sei atua kualker momentu ba sidadaun sira ne'ebé la kumpri regras ne'ebé estadu hatur ona," nia afirma.