Tuir MOP, subsidiu ne'ebé oferese la'os kreditu ka deve ba EDTL tan ne'e sei la selu fila fali ba EDT.
"Klarifika katak 'Subsídiu' la'os 'kréditu' ka 'deve' ba EDTL, ne'ebé hanesan espalla iha públiku. Klientes 160.555 ne'ebé hetan subsídiu pulsa $15 sei la selu fali ba EDTL," informa MOP liu husi ninia pajina facebook, Segunda (06/04).
Iha oportunidade ne'e, MOP mós halo klarifikasaun relasiona ho pergunta balun kona-ba valor subsidiu.
Hafoin MOP oferese subsidiu mosu estatus balun iha media sosial ne'ebé kestiona katak valor subsidiu $12.50 de'it la'os $15.
"Husu ba públiku labele halo interpretasaun sala katak subsídiu $15 ne'e EDTL fo de'it $12.50, tanba loloos ne'e mak 125kwh la'os $12.50 sentavus," dehan nia.
"Subsídiu $15 ekivalente 125 KWH ba doméstiku (0.12/kwh). $15 ekivalente 62.5 KWH ba kliente ho kategoria seluk (0.24/kwh)," MOP esplika.
Iha oportunidade ne'e MOP afirma fila fali intensaun husi oferese pulsa gratuita ba kliente hamutuk 160.555 mak atu hamenus movimentasaun no ema konsentra iha fatin hola pulsa.
Ida ne'e, tuir MOP hanesan kontribui ba prevensaun Covid-19 hadaet ba ema seluk.
Entretantu, subsidiu gratuita ba kliente EDTL hahú funsiona ona iha Domingu (05/04).