PM Taur dehan, nu'udar Xefe Governu nia lakohi ona atu serbisu ho ema ne'ebé nia la konfia ona.
"Razaun ida de'it, ha'u lakon konfiansa ba Señora membru governu ne'e (Elia), ha'u lakon konfiansa tanba ha'u lakohi serbisu ho nia," dehan PM Taur hafoin reuniaun liña ministerial iha Sentru Konvensaun Dili, Segunda (06/04).
Hafoin Prezidente Repúblika aseita demisaun ne'e, PM Taur dehan, to'o ohin loron seidauk iha figura ida mak atu troka nia fatin.
"Dadaun ne'e seidauk, Vise Ministru atual mak tau-matan, mais ba oin ami bele haree," dehan nia.
Molok ne'e, Primeiru Ministru Taur Matan Ruak hato'o pedidu ba Prezidente Repúblika hodi husu atu demite Vise Ministra Saúde Elia dos Reis Amaral.
PR Lu Olo ne'ebé simu pedidu ne'e aseita ho desizaun PM Taur hodi hasai Elia husi nia kargu ne'ebé durante ne'e nia okupa.
PR Lu Olo liu husi dekretu númeru 30/2020, 3 Abril, deklara aseita ho pedidu PM Taur hodi ezonera Vice Ministra Saúde Elia dos Reis Amaral husi nia funsaun iha governu Konstitusional daualu.
Dekretu ne'e hahú tama iha vigor iha 3 Abril 2020.