Ministru Dionisio Babo hatete, situasaun ne'ebé mosu daudauk ne'e la permite atu Timor-oan sira iha rai li'ur fila mai TL.
"Ba Timor-oan sira ne'ebé hela iha rai li'ur, agora ne'e la'ós tempu par mai Timor. Agora ne'e, favor ida hela hotu iha ne'ebá, kuidadu aan, tanba governu sei haree liu husi meiu oinsa par liu husi embaixada sira hodi apoiu no ajuda, maibé favór ida labele fila mai Timor," dehan Ministru Dionísio iha Palásiu Prezidensiál Bairro-pite, Dili, Tersa (07/04/2020).
Ministru ne'e dehan, atu prevene surtu Covid-19 daet ba Timor-oan sira iha teritoriu nasionál, iha semana hirak oin mai governu sei taka total fronteira.
"Ita preve katak semana ida ka rua ba oin ita taka kompletamente ita-nia fronteira sira hotu, entaun hela iha ne'ebá, governu mak buka médida hodi apoiu tuir kapasidade governu nian," dehan Babo.
Ttu prevene virus ne'e labele ameasa ba saúde públika, nia dehan, Timor-oan sira mantein hela iha estranjéiru no fiar sistema saúde iha ema-nia rai.
"Buat ruma ba kedas tratamentu no halo teste," nia husu.