Tempotimor (Dili)- Medikus Timoroan ne'ebe daudaun ne'e tuir hela prosesu estudu iha area espesialista,  iha nasaun Kuba nain tolu tama kuarentina.

 

Tuir Diretora Jeral Prestasaun Servisu Ministeriu Saude, Odete da silva Viegas katak, iha informasaun semana liu-ba Timor oan nain tolu iha nasaun Kuba tama kuarentina.

 

"Sobre medikus ne'ebe dadaun ne'e hala'o espesialista iha kuba, los iha semana liu-ba hau mos hetan duni informasaun husi mediku sira iha kuba katak, sira iha ema nain tolu halo kuarentena", relata Nia liu-hosi konferensia imprensa, iha Sentru Konvensoes Dili, kinta (9/4).

 

Dotora ne'e afirma, sira tama Kuarentina tanba halo hela atendimentu ba ema sira ne'ebe morsa Covid-19, maibe la signifika sira pozitivu maibe signifika sira halo ona kontaktu ho ema ne'ebe pozitivu, entaun sira presiza kuarentena.

 

"Iha kuarentena ne'e mos Timor-Leste halo akordu ho nasaun Kuba, entaun ida ne'e faz parte servisu ida ne'ebe mak Ministeriu Saude Kuba atu bele hare", Nia hatutan 

 

Nune'e dadaun ita nia maluk sira iha kuarentena, maibe informasaun ba sira nia evolusaun seidauk hatene kle'an, karik sei hetan fila-fali informasaun mak bele pasa ba publiku. Kuba informa katak 

 

"Kona-ba papel Ekipa Integradu Jestaun Krizi nian ba iha mediku sira iha kuba, foin dadauk ne'e mos ko'alia sobre medikus no estudantes aira iha liur sei hetan mos atendimentu ida ou espesial husi ita nia governu karik subsidiu ruma ne'ebe sira sei hetan, tanba ne'e Sentru Integradu Jestaun Krizi bele rekomenda, maibe desizaun hotu la'os iha SIJK, maibe husi Primeiru Ministru Taur Matan Ruak", Nia hakotu.

 

Maibe tuir Fonte www.tempotimor.com iha Havana informa katak Timoroan nain lima mak tama ona ba kuarentena.

 

"Kolega dr. nain hat ne'ebe foti espesialista Medisina Intensiva mak muda ona ba kuarentena Cuesta de Sol iha Municipiu La Lisa, Havana no enkuantu dra. ida sei nafatin izola hela iha kuarentena ne'ebe estabelese iha rezidensia estudantil planta 19, nune'e hamutuk sira na'in lima maka iha Kuarentena," dehan fontes ne'ebe husu labele publika nia naran.

 

Daudaun ne'e tuir dadus ne'ebe iha hatudu katak Timoroan nain lima nolu maka estuda hela iha Kuba.

 

"Numeru Timoroan ne'ebe tama Kuarentena bele aumenta tan ba halo praktek hamutuk ho dr. Kubanu ida ne'ebe pozitivu ona Covid 19," relata fontes ne'e.