Iha Sesta (10/04), gabinete Sentru Integradu ba Jestaun Krize (SIJK), Timor-oan ida ne'ebé durante ne'e kuarentena iha hotel ida iha Dili laran pozitivu Covid-19.

Tuir autoridade ida ne'ebé lakohi publika identidade hatete, Timor-oan ne'ebé pozitivu Covid-19 durante ne'e kuarentena ho ema na'in 37 seluk iha Hotel Katuas.

"Mai kuarentena iha Hotel Katuas ne'e hamutuk sira na'in 38. Depois iha tiha loron sia mak foin mosu sintomas ba pesoál ne'e hanesan mear, isin manas, inus metin, kakorok moras inklui dada iis susar," dehan autoriedade ne'e ba tempotimor.com via telefone, Sabadu (11/04/2020).

Nia hatete, hafoin identifika ida pozitivu Covid-19, MS deside atu sira na'in 37 seluk tenke halo teste no labele sai molok rezultadu teste sai.

Fontes ne'e dehan, problema boot ne'ebé daudauk ne'e hasoru mak durante loron hirak iha kuarentena, pasiente Covid-19 halo ona kontaktu ho ema balun.

"Agora problema mak ne'e, nia istória aat ne'e, nia kontaktu sira ne'e mak sei problema," fontes ne'e hatete.

Entretantu, tuir informasaun, Timor-oan ne'ebé pozitivu Covid-19 ne'e hala'o viajen husi Maluku ba Surabaya iha 31 Marsu, iha 1 Abril nia aranka ba Kupang no mai liu Mota Ain, Batugade, ho Timor-oan na'in 7 seluk.

Hafoin to'o iha Mota Ain, sira nain 8 sae bus hamutuk ho kondutor no nia ajudante na'in 2. Signifika, ema na'in 10 mak halo kontaktu ona direitamente ho suspeitu Covid-19 molok tama iha Kuarentena.

Maske nune'e, iha mós posibilidade boot pasiente ne'e halo ona kontatu ho nia familia no ema seluk tan.