Molok ne'e, iha Sesta (10/04), SIJK anunsia katak Timor-oan ida ne'ebé hela iha kuarentena Hotel Katuas (eis City Cafe) hamutuk ho Timor-oan na'in 37 seluk pozitivu Covid-19.
Hafoin anunsia rezultadu refere, mediku sira hahú mós halo teste ba Timor-oan na'in 37 no buka tuir mós istoria kontaktu husi ema ne'ebé pozitivu Covid-19.
LEE MOS : Ambulansia Tama Sai Otel Katuas, Posibilidade Númeru Pozitivu Covid-19 Aumenta
Iha Domingu (12/04) maizumenus tuku 20.30, ambulansia ida vizita dala rua ba Hotel Katuas ne'ebé deskonfia tula sai Timor-oan na'in rua seluk ne'ebé dezenvolve sintomas Covid-19.
Hafoin liu husi prosesu teste, ikus mai identifika duni katak iha Timor-oan na'in rua ne'ebé mós tama kuarentena iha Hotel Katuas pozitivu Covid-19.
Membru ekipa SIJK ne'ebé mós nu'udar Diretora Jerál Prestasaun Saúde-Ministériu Saúde (MS), Odete Viegas informa, Timor-oan na'in rua tan mak pozitivu Covid-19.
Ho nune'e, nia dehan, total kazu pozitivu Covid-19 iha Timor-Leste sa'e ba kazu haat (4). Ida rekopera no kazu foun tolu.
"Kazu konfirmadu na'in haat, foun na'in rua tan ne'ebé aumenta ho ida ne'ebé antens ne'e, no ida seluk rekopera ona, nune'e hamutuk na'in haat. Kolega rua ne'e tama iha fatin ne'ebé antes ne'e kolega ida pozitivu hela ba," informa Odete bainhira atualiza informasaun kona-ba Covid-19 iha Sentru Konvensaun Dili, Segunda (13/04).
"Sira na'in rua, grupu ida ne'ebé mai husi Kupang, kazu rua ne'e hamutuk ona iha Vera Kruz, maibé felizmente sura nia kondisaun di'ak, laiha mear, laiha isin manas," dehan nia.
Daudauk ne'e, nia hatete, pasiente na'in rua refere tama ona iha fatin izolamentu Vera Kruz.