Tuir nota esplikasaun husi Sentru Media Covid-19 ne'ebé www.tempotimor.com asesu husi pajina facebook Sentru Media-COVID-19 iha Tersa (14/04) tuku 11.55, katak preokupasaun publiku relasiona ho “Bus Maliana” ne’ebé tula sidadaun sira husi Mota-Ain mai iha Dili, ba Kuarentena iha 01 Abril 2020 pertinente no relevante iha kontextu ohin loron.

Tan ne'e, Sentru Media Covid-19, hakarak klarifika katak hafoin Prezidente Repúblika dekreta estadu emerjensia iha 28 Marsu 2020 laiha ona transporte públiku ne'ebé movimenta, inklui bus ba-mai Dili-Maliana.

"Ne’e katak bus ne’ebé tula ita-nia sidadaun sira husi Mota-Ain mai Dili, tanba hetan aluga ka kontrata husi Ministeriu Saude atu tula de'it ita-nia pasajeiru sira ne’ebé tama husi fronteira, laos pasajeirus komun," esplika sentru media.

Tuir informasaun husi sentru media Covid-19, iha 1 Abril 2020 iha bus rua mak tula Timor-oan sira husi Mota-ain mai Dili ho total ema na'in 37 no tama direitamente iha kuarentena iha Hotel Katuas.

Hafoin deteta kazu pozitivu dahuluk iha Hotel Katuas iha 10 Abril, iha loron tuir mai, kondutór na'in rua ho nia ajudante na'in 4 husi bus rua refere tama kedas iha Kuarentena iha Maliana.

"Sira na'in 6 iha hela observasaun Ministeriu Saude nian durante loron hirak ne’e, no ohin loron 14 fulan Abril 2020, ekipa Vizilansia Epidemiologika no Ekipa Laboratoriu Nasional sei ba Maliana hodi foti sira-nia amonstra no teste, maske risku atu hadaet virus corona kiik tebes," esplika Sentru Media Covid-19.

Molok ne'e, ekipa SIJK ne'ebé mós nu'udar Diretora Jeral Prestasaun Saude-Ministériu Saúde, Odete Viegas informa, kazu foun rua ne'e iha ligasaun ho kazu dahuluk ne'ebé anunsia iha Sesta.

Odete dehan, sira na'in rua sa'e travel hamutuk ho kazu dahuluk husi Kupang mai to'o iha fronteira Batugade. Iha travel laran, la'os de'it sira na'in tolu, maibé mós iha Timor-oan na'in neen (6 seluk).

Hafoin tuun iha Batugade, sira na'in ualu (8) sa'e bus Maliana hamutuk ho ema na'in 17 seluk, númeru ne'e la sura ho kondutór no ajudante na'in rua.

“Ita hatete de'it  katak kolega rua ne’ebé mak dadaun hetan pozitivu (Covid-19) ne’e tama iha grupu kolega ida horibainrua hetan pozitivu ne’e. Sira na'in 8 ne’ebé mak hala'o viajen husi Kupang mai Batugade, sira na'in 8 iha travel ida. Husi Batugade mai Dili sae bus Maliana, iha bus laran ne'e hamutuk 25 pesoas, ne’e la inklui ho kondutor ho konjak rua,” dehan Odete iha Sentru Konvesaun Dili, Segunda (13/04).

Nia hatutan, tanba kontatu ne'ebé pasiente Covid-19 halo ona, iha Tersa (14/04) ekipa ida sei tuun ba Maliana hodi halo teste ba sira ne'ebé sa'e bus hamutuk ho pasiente pozitivu sira.

"Maluk sira ne'ebé mak agora daudauk iha distritu, hanesan ohin ha'u hatete ba ita-boot sira katak (sira) ne'ebé mak (sa'e) bus Maliana (hamutuk ho pozitivu Covid-19 na'in tolu), aban (ohin) sei tuun ba terenu par hasai sira-nia amostra maske sira seidauk iha sintomas mais ita tenke hasai amostra tanba ita hakarak atu limita númeru transmisaun," katak nia.