Sentidu Kondolénsia ne'ebé Prezidente Repúblika hato'o liu husi komunikadu imprensa, kuarta ne'e.
"Ho laran-susar tebes mak ha’u simu notísia kona-bá Doutór Daniel Murphy ne’ebé mate derrepente", dehan PR Francisco Guterres Lu-Ólo.
Enkuantu Saudozu Dr. Daniel Murphy moris iha Iowa, Estadus Unidus Amérika, iha loron 23 fulan Setembru tinan 1944. Hori uluk kedas nia ema ida ne'ebé preokupa tebes ho justisa sosiál.
Ho konsiénsia ne'ebé matebian hetan no buras durante funu Vietname to’o ikus mai, motiva nia sai hanesan objetór konsiénsia nian, iha momentu ne'ebá maski la’ós ema militár, maibé nia harii klínika no hanesan doutór hodi fó asisténsia saúde, ba ema imigrante no traballadór mukit sira iha Estadus Unidus Amérika.
Iha dékada 70 nia rohan, saudozu Dr. Daniel Murphy ho nia família bá Moçambique hodi kontribui ba moderniza medisina iha área rurál sira. no iha nasaun Moçambique mak saudozu Dr. Daniel Murphy hetan koñesimentu kona-bá jenosídiu ne’ebé akontese iha Timor- Leste.
Iha momentu ne’ebá, durante Okupasaun Indonézia iha TL, labele halo buat ida no tuur nonok de’it, maibé to’o ikus mai, Eis-PR Indonézia Suharto rezigna-aan no territóriu ne’ebé okupadu komesa loke uitoan ba mundu. Nune’e, iha tinan 1998, saudozo fa'an nia sasán tomak iha Estadus Unidus hodi mai Timor-Leste, lori de’it mala ki’ik ida, nia estetoskópiu ne’ebé sempre hamutuk ho nia no bola basketeból ida.
Iha períodu hirak ne'e, saudozu Dr. Daniel Murphy hala’o nia knaar nu’udar doutór hodi tau matan ba sira-ne'ebé sai vítima iha okupante sira-nia liman. Iha tinan rua tuir mai, sai hanesa momentu ne'ebé aat liu, iha nia moris, hodi enfrenta sofrimentu no fó risku boot ba nia-aan.
Matebian hanesan anju, ne'ebe durante ne'e salva ema barak nia vida!
Ho matebian nia servisu no dedikasaun tomak, mak ikus mai, saudozo Dr Daniel Murphy hetan Prémiu Sérgio Vieira de Mello no hetan kondekorasaun ho Medalla Orden Timor-Leste.
Iha tempu dame nian, Dr. Daniel dedika-aan hodi harii klínika ida, ne'ebe koñesidu hanesan Klínika Ba Ema Ki'ak ho naran Klínika Bairro Pité.
Tinan barak ona, mak timor-oan rihun ba rihun, hetan tratamentu iha Klínika Bairro Pité. Ba saudozo nia trabalhadór no kolaboradór sira, Prezidente Repúblika hato’o agradese wa'in no sentimentu laran-susar
"Ha’u husu ba Ita-Boot sira atu sai dignu ba legadu folin tebes ne’ebé mak saudozu Dr. Dan Murphy husik hela. Ida-ne’e mak iha imi nia liman no ha’u tau konfiansa tomak ba imi. Ba família ne’ebé lutu hela iha nia rain moris-fatin Estadus Unidus no iha nia rai doben Timor-Leste, ha’u hakarak hato’o ami-nia sentidu kondolénsias no obrigadu wain", dehan Xefe Estadu Lu-Ólo.
Enkuantu saudozo Dr.Daniel Murphy hakotu nia peregrinasaun ikus iha mundu, iha tersa-feira kalan mais ou menos 20 ho balun, tanba moras kardíako
