SIJK: Suspeitu Covid-19 iha Ermera Kuarentena iha Uma

dr. Rui Maria de Araujo, portavoz Sentru Integradu Jestaun Krize kona ba Covid 19, ko'alia ba jornalista sira iha Sala Situasaun, CCD Dili (17/4) dr. Rui Maria de Araujo, portavoz Sentru Integradu Jestaun Krize kona ba Covid 19, ko'alia ba jornalista sira iha Sala Situasaun, CCD Dili (17/4) Foto Isac Oliviera

Tempotimor (Dili)-Timor-oan ida ne'ebé sai ona husi kuarentena obrigatoriu iha Dili no hatudu sintomas Covid-19 hafoin fila ba hamutuk ho nia familia iha Hatulia, Munisipiu Ermera, daudauk ne'e kuarentena iha nia uma hodi hein rezultadu teste.

Portavoz Sentru Integradu Jestaun Krize (SIJK) dr. Rui Maria de Araujo informa, hafoin simu informasaun, ekipa vizilansia, ekipa epidemolojia no ekipa laboratoriu tuun kedan ba Hatulia hodi hasai amostra atu halo teste no analiza.

dr. Rui dehan, daudauk ne'e Timor-oan ne'e halo konfinamentu obrigatoriu iha nia uma no hetan akompñamentu husi profesional saúde sira.

"Ema ne'e rasik agora halo konfinamentu obrigatóriu iha nia uma no akompaña husi profesinál saúde sira," dehan Rui iha Sala Situasaun SIJK, Sentru Konvensaun Dili, Sesta (17/04).

Iha fatin ketak, Diretór Servisu Saúde Munisípiu Ermera António de Deus Fátima informa, Timor-oan ne'e hatudu sintomas hanesan ho sintomas Covid-19.

"Sidadaun ne'e hatudu ona sintomas Covid-19 hanesan mear, isin-manas, no inus been," dehan nia.

Diretór ne'e dehan, daudauk ne'e nia tama ona iha kuarentena hodi hein rezultadu teste ne'ebé halo ona.

Bainhira rezultadu teste ne'e pozitivu, nia hatutan, ekipa sei halo kedas teste ba ema hirak ne'ebé halo ona kontatu ho suspeitu ne'e.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.