Hanesan públiku hatene, periodu estadu emerjensia ne'ebé Prezidente Repúblika dekreta sei remata iha 26 Abril 2020.
Ho tempu estadu emerjensia ne'ebé falta loron 9, liña ministérial ne'ebé hola parte iha komisaun ida ba prevensaun Covid-19 aprova ona proposta ba extensaun estadu emerjensia.
Ministru Reforma Legislativu Asuntu Parlamentar (MRLAP) Fidelis Manuel Leite Magalhaes hatete, aprovasaun ba pedidu extensaun estadu emerjensia ne'e mai husi konsiensia liña ministerial hotu-hotu.
"Ohin iha diskusaun no desizaun kona-ba extensaun ba estadu emerjensia. Ohin membru komisaun halo desizaun ho konsensual katak, liña ministerial hotu-hotu konkorda laiha objesaun ida halo hikas proposta ba extensaun estadu emerjensia ba loron 30 tan," dehan Fidelis hafoin reuniun liña ministerial iha salaun Ministeriu Finansas, Sesta (17/04).
Hafoin aprovasaun ne'e, nia hatete, proposta refere sei aprezenta ba Konsellu Ministru hodi deskuti no aprova, hafoin sei hato'o ba Prezidente Repúblika.
"Ohin aprova ona medidas extensaun ba estadu emerjensia, maibé nia prosesu la'o normal hanesan baibain katak, pedidu atu extende tan estadu emerjensia ne'e sei liu husi Konsellu Ministru depois governu hato'o ba Prezidente Republika i depois fila-fali mai parlamentu nasional, lala'ok sei la'o hanesan ne'e," nia esplika.
Fidelis hatutan, ekipa teknika legal sira hahú ona serbisu atu haree saida mak presiza halo atu bele hato'o tan fali pedidu kona-ba extensaun estadu emerjensia hafoin periodu dahuluk estadu emerjensia remata.