Tula Amostra Covid-19 ba Australia, Governu Selu Aviaun Rihun $15 Kada Vou

Aviaun Air North Aviaun Air North FotoFile Air north

Tempotimor (Dili)-Governu Timor-Leste tenke selu aviaun Airnorth husi Australia ho presu rihun $15 kada vou hodi tula amostra Covid-19 husi Timor-Leste ba Australia hodi halo konfirmasaun.

Ministru Koordenador Asuntu Ekonomia (MCAE) interinu Fidelis Manuel Leite Magalhaes hatete, Timor-Leste aluga aviaun Airnorth semana ida vou dala tolu ho presu rihun $15 kada vou.

"Iha presu ne'ebé kompetedor aviaun kompaña fó, Airnorth nia folin mak di'ak liu no baratu liu. Ita garante katak ne'e baratu liu tanba ne'e $15 mill de'it, maibé kompaña balun fó folin liu ida ne'e, tres vezes liu fali Airnorth ne'e," dehan Fidelis hafoin reuniaun liña ministerial iha Salaun Ministeriu Finansas Aitarak-Laran, Sesta (17/04).

Nia hatete, razaun fundamental Australia oferese aviaun ho folin baratu tanba Australia nu'udar parseiru TL nian no lakohi husik TL bainhira emfrenta hela situasaun defisil.

"Airnorth nia argumentu katak ne'e importante hodi asegura, tanba Timor nia parseiru ne'ebé iha situasaun defisil hanesan ne'e, hanesan parseiru nia labele soe hela Timor," dehan nia.

Maske selu ho rihun $15, maibé, tuir Fidelis, bainhira sura ba-mai TL selu de'it rihun $12 tanba karik Australi tula arko fulan ida remata selu ba estadu Timor-Leste ho montante orsamentu rihun $3.

"Entaun signifika Timor selu de'it $12 mill ba Australia," dehan nia.

Aleinde tula amostra pasiente Covid-19 ba Australia hodi halo konfirmasaun, Fidelis hatutan, Airnorth mós bele transporta ai-moruk no medikamentu Covid-19 mai Timor-Leste.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.