Tempotimor (Dili)- Porta-Vóz Sentru Integradu Jestaun Krize (CIGC) sigla iha portugés, Odete Viegas, hatete Pasiente Covid-19, na'in 18, inklui provável na'in 4,  iha fatin izolamentu Sentru Saúde Vera Cruz,  hetan akonsellamentu husi psikologu sira.

 

Odete Viegas akresenta Alende hetan akonsellamentu, profisionál saúde sira kontinua halo vizilánsia ka akompañamentu ba pasiente sira, hodi haree sira nia saúde.

 

"Dadauk ne'e maluk sira ne'ebé iha Vera Cruz, nafatin hetan monitorizasaun, akompañamentu husi parte médiku sira, nomos akompañementu espirituál no psikologu sira mak halo atendimentu ba sira," dehan Odete Viegas ba kornalista sira, liu husi konferénsia imprensa, Domingo ne'e, iha Sala Situasaun Sentru Konvensoens Díli (CCD) sigla iha portugés.

 

Durante iha Konferénsia Imprensa ne'e, Doutora Odete Viegas informa mos, antes ne'e (horseik) parte saúde no psikolgu sira halo ona akonsellamentu ba sidadaun timor-oan sira ne'ebé hala'o hela kuarentena iha Tasi-Tolu, tanba konsidera apoiu psolikologu ne'e importante ba sira, atu sira labele hanoin barak, durante hela ihankuarentena.

 

"Horseik ami mos halo akompañamentu no akonsellamentu ba maluk sira ne'ebé hela iha kuarentena Tasi-Tolu. falta de informasoens ne'e sai mos fontes ba sira hodi hanoin barak, stress, tanba ida husi parte saúde nia hamoin katak, apoiu morál, apoiu psikkolójika ne'e importante nomos iha kriatividade ruma ba sira, entaun ohin dader hahu halo ezersísiu fíziku ba sira",  Nia afirma.

 

Maibé durante halo jinástika ka ezersísiu fízika ne'e, sira kontinua kumpri medidas preventivas ne'ebé mak ezisti hanesan distánsia sosiál.

 

Enkuantu tuir dadus atuál Timor-Leste rejista ona kazu konfirmadu na'in 19, husi ema hirak ne'e, na'in 18 mak kazu ativu, na'in ida rekuperadu inklui kazu provável 4.