Tuir atual Vise Prezidente Bankada CNRT ne'e, pesoal ne'ebé konsidera serbisu iha liña mean mak mediku, PNTL, no F-FDTL.

Nia hatete, karik governu iha insentivu ba pesoál husi instituisaun hirak ne'e, tenke diretamente ba sira-nia konta bankária.

"Se governu iha hanoin fó subsidiu ka insentivu serbisu ne'ebé sira halo, liu-liu servisu extra durante periodu estadu emerjénsia no ligadu ba Covid-19, di'ak liu tau diretamente ba sira-nia konta bankária, atu nune'e serbisu ne'ebé sira iha, direitu mós sira simu diretamente," dehan Patocino iha plenaria PN, Tersa (21/04).

Tanba, tuir nia, iha esperensia barak ne'ebé hatudu ona katak insentivu ne'ebé oferese la to'o ba pesoal sira ne'ebé serbisu iha liña oin.

"Iha esperiénsia lubuk mak liu, depois subsidiu ne'ebé estadu tau to'o ikus dala-ruma la to'o ba sira ne'ebé kiik liu ka sira ne'ebé dala-barak liu iha liña oin," dehan nia.

Deputadu ne'e dehan, bazeia ba fiskalizasaun ne'ebé halo iha munisipiu, mosu preokupasaun balun husi funsionariu sira kona-ba insentivu ne'ebé sira rona de'it maibé la simu to'o agora.

"Dala-barak funsionáriu sira ne'ebé kiik liu, barak liu sai instrumentu de'it ba polítika ne'ebé iha," dehan deputadu ne'e.